Yewinê dewlete yê eyaletanê Baden-Wurtembergî yê Almanya bi metodanê Tirkîya vera kurdan û dezgehanê kurdan teda, şantaj kenê.

-''Seba keşima bibê hemserek û îdarekarî muracatê kamî kenê, kam nê wezîfeyî tesdîq keno?''

-''Herinda ke şima şorê komeleyanê bînan û komelê almanan rê entegre bibê şima çira benê endamê komeleyêka kurdan?''

-''Şima çira hetkarîya Heyva Sor a Kurdîstanî kenê?''

-''Îdarekarê komeleya şima xebatanê cepheyî yê PKKyî dewam kenê?''

-''Şima çira her serre serrgêra tepişîyayîşê Ocalanî de tewrê çalakîya Strasbourgî benê?

Nê persî hetê yewinanê dewlete yê eyaletanê Baden-Wurtembergî yê Almanya ra kurdîstanijan rê yenê perskerdene. Almanya de hemserek, îdarekar û endamê komeleyanê kurdan hedefê yewinanê asayîşî û îstîxbaratê bi nameyê Rêxistina Pawitişê Qanûnê Bingeyî de yê.

Seba îfadegirewtişê kurdan hetê karmendanê Dayîreyê Bîyanîyan, walîtîyan, Mudirîya Asayîşî û îstîxbaratî ra komîsyonêke ronîyaye. Na komîsyone kurdan rê vana ke wa şorê welatê xo, înan rê ajanîye teklîf kena.

Wextê peyênî de tewr tay 20 kurdîstanijî hetê na komîsyone ra ameyî vengdayene û înan rê persî ameyî persayene.

Komîsyone vera kurdan metodanê ke ê Tirkîya ra kêmêr nîyê, xebitnena. Komîsyone bi taybetî multecîyanê Kurdîstanî kena hedef ke seba roniştişî destûrê înan çin o. 

Serra 2011î ra nata nê eyaletan de kurdî yenê krîmînalîzekerdene. 

Paytextê eyaletî Stuttgart de sîyasetmedarê kurdî Veysel S., Agîd K., Evrim A., Ozkan T. û Cîhan A. parna yenê hukmkerdene. Hukmkerdişê nê aktîvîstan 11ê êlule de do reyna bêro destpêkerdene.