Bajarê Frankfurtî yê Almanya de serkêşîya KON-MED, FED-KURD, FCK, FED-MED, FCKM-KAWA, YJK-E-Almanya de bi şîarê “Newroza azadiya Rêber Apo Pîroz be” Newroze ameye pîrozkerdene.

Bajaranê cîya cîyayanê  Almanya ra bi des heran kesî Frankfrut de ameyî têhet. Şayîya Newroze de Vileweka Serra Pancasine ya PKKyî ameye selamkerdene, tecrîdê serê Rayberê Şarê Kurdî Abdullah Ocalanî ame protestokerdene û ame waştene ke wa qedexeyê serê PKKyî bêro wedaritene.

Despêkerdişê şayîye ra heta qedîyayîşî şarî slogana ''Biciwîyo Serek Apo'' eşte. Şayîye de xoverdayîşê gerîlayan zî ame selamkerdene. Tewrbîyayîşê Newroze goreyê serranê verênan zafêr bi. Bitaybetî cinîyî bi kincanê xo yê herêmîyan tewrê şayî bîyî. Goreyê zanayîşê ke komîteya amadekerdişî ra ameyî girewtene û goreyê zanayîşanê ke yeno îdîakerdene ke bêtelanê polîsan ra ameyî vatene 60 hezarî ra zafêr kesî tewrê Newroze bîyî.

Şayîye de Hemserekê KON-MED Zubeyde Zumrut û Engin Sever, Vervatoxa HDPyî yê Ewropa Leyla Îmret û temsîlkaranê Têgêrayîşê Şorişê Yewbîyayeyî yê Şaran (HBDH) û Têgêrayîşê Ciwanan ê Şorişgêran qisey kerd.

Zumrute Rayberê Şarê Kurdî Abdullah Ocalan sey xeta sûre ya kurdan name kerd û vat heta azadkerdişê Ocalanî kurdî do tim têkoşîn bikerê.

Engin Severî zî bale ante qedexeyê serê PKKyî ser û vat ganî no qedexe cadê bêro wedaritene. Severî veng da dewletanê ke çeke roşanê dewleta tirke û vat: ''Qirkerdişê Kurdîstanî pê çekanê şima benê.  Garê, Heftanîn û Metîna de çekê kîmyewîyî ameyî şuxulnayene. Nê çekî Ewropa ra ameyî girewtene. Ewro şarê kurdî nê warî de azadîya xo azadîya Rayberîya xo wazeno. Eke dewletê Ewropa Rojhilatê Mîyanênî de haştîye wazenê ganî Rayber Apo reyde pêvînayîş bêro kerdene.

Leyla Îmretî zî bale ante gamanê haştîye yê ke Abdullah Ocalanî eştî ser û vat dewleta tirke tim pê hêrişan cewabê vengdayîşê haştîye da.

Eşkerayîya bi nameyê HBDHyî de zî ame vatene seba ke şarî wazenê qederê xo tayîn bikerê raştê bombayanê serdestan yenê û mesajê xoverdayîşî ame dayene.

Ciwananê şorişgêran zî bale ante têkoşînê bêmabênî yê ciwanîya Apoyî yê pancas serran ser û vat ewro ra tepîya qet çew nêeşkeno verê kurdan bîgêro.

Şehrîbana Kurdî ya ke bi deyîranê xo reng da şayîye bale ante yewîya kurdan ser. Koma Bajarî ra Vedat Yildirimî zî coşê şarî rê heyran mend. Repvaj Sherrif Omeri zî gerîlayanê ke Rojawan îşxalî ra xelisna selam kerdî. Grubêka govende ya Tev-Çandî zî pê kayê xo reng da şayîye.