Nobeta Azadîye ya ke 25ê hezîrana 2012î ra nata şaristanê Strasbourgî yê Fransa de yena kerdene hewteyê 619inî de dewam kena. No hewte koma Duisburgî ya Almanya nobete dewr girewte. 

Kome de kurdîstanijî Mesût Avras, Abdullah Tolayman, Mûrat Erzem û Edîp Elîtaş cagênê.

Vervatoxê kome Mesût Avrasî vist vîrî ke ê 12 serrî yo bêmabên na çalakîye kenê û vat: ''Rayber Apo 25 serrî yo esîrkerde yo. No seba Ewropa şerm a. Sey şarê kurdî 12 serrî yo ma vera bêvengîya Ewropa tewirê xo mojnenê. Heta ke netîce bivisnê destî ma do bi têkoşînê xo wayîrê Rayber Apoyî vejîyê.

Şarê kurdî nika prosesêkê krîtîkî ra derbaz beno. Hîrê serrî yo Rayber Apoyî ra xeberêke zî nêna girewtene. Seba wayîrvejîyayîşê îradeyê xo û şiknayîşê tecrîdî, seba ameyoxêkê azadî û Kurdîstanê azadî ma do çalakîyanê xo xurtêr bikerê.''

Avrasî ancî tewirê Konseya Ewropa yê serê tecrîdê Îmraliyî şermezar kerd û vat: ''Têkoşînê kurdan o heqdar do ser bikewo.''