Parlamentoyanê xeylêk welatanê Ewropa de Newroze bi resepsîyonan ameye fîrazkerdene.

Paytextê Fransa Paris de otêlêke de hetê Meclîsê Demokratîkî yê Kurdan ê Fransa (CDK-F) ra resepsîyonê Newroze ame kerdene. Xeylêk endamê Parlamentoyê Fransa, fransizî, Fermandara YPJyî Nesrîne Abdullah, Fermandarê YPGyî Nûrî Mehmûd, Hemserekê KNKyî Ahmet Karamus, Endamê Konseya Rayberdişî ya KNKyî Zubeyîr Aydar, Hemserekê KCDK-E Yuksel Koç û nuştox Ferda Çetîn zî tewrê resepsîyonî bîyî. Resepsîyon de Newroze ameye fîrazkerdene û fermandaranê YPG û YPJyî bale ante rewşa Rojawanî ser. Fermandaran seba têkoşînê vera DAÎŞî paştdayîş waşt. Hunermend Diyar Mehrûwî resepsîyon de vejîya sehne ser.

Bi hemkarîya Centre for Kurdish Progress û Meclîsê Şarê Kurdî yê Brîtanya Parlamentoyê Îngilîstanî de resepsîyon ame kerdene. Têna 300 kesî sixletî ra eşkayî tewrê resepsîyonî bibê. 95 wekîlî zî resepsîyon de amade bîyî. Temsîlkarê Meclîsê Sûrîyeya Demokratîke Massod Kaso, Hemserekê Meclîsê Şarê Kurdî Elîfe Sarican û wekîlo verên ê HDPyî Osman Baydemîrî zî resepsîyon de qisey kerd.

Parlamentoyê Melbournî yê Avusturalya de zî serkêşîya Partîya Karkeran û Partîya Keskan de bi resepsîyonêkî Newroze ameye fîrazkerdene. Senator Enver Erdogan, Endama Meclîsê Cinîyan ê Kurdan Oznure Akbaş û Wekîla Tamîle Ratname resepsîyon de qisey kerd. Resepsîyon pê govendan qedîya.

Belçîka de serkêşîya Enstîtuyê Kurdkî û Kongreya Neteweyî ya Kurdîstanî Merkezê Kulturî yê De Marktan de resepsîyonê Newroze ame kerdene. Wekîlê Belçîka tewrê resepsîyonî bîyî. Resepsîyon de ame vatene ke Newroze leweyê Têkoşînê Azadîya Kurdan temsîl kena. Partîya S&D ra û Endamê Parlamentoyê Ewropa Costas Mavridest zî resepsîyon de qisey kerd.