6ê Elule ya 2017î de bajarê Hannoverî yê Almanya de semedê virardişê Hesen Şirnex (Huseyîn Kûlûman) û Alî Çîkek yê ke Kampa Mexmûrî de şehîd kewtîbî, Egîd Sarûhan (Delîl Qamişlo) o ke Avaşîn de şehîd kewtbi, Ugur Daskan (Hogir Bakustan) o ke Colermêrg de şehîd kewtbi û Mehmet Mendaliogluyî (Amed Kawyan) o ke Şengal de şehîd kewtbi aktîvîteyêk ameyebî viraştene.

Polîsê Hannoverî ke bi tewirê xo yê xirabî yeno zanayene, na aktîvîteya ra 1 serre û nîme dima êyê ke tewrê aktîvîteye bîyî, derheqê înan de ciperayîş da destpêkerdene. Polîsî serrêk semedê tesbîtkerdişê tewrbîyayoxanê aktîvîteye xebityayî. Dima ra  semedê îfadedayîşî vang da 25 Kurdistanijan. Vengdayîşê îfadeyî ke destê ANF de yo de yeno vatene ke bi tewrbîyayîşê aktîvîteya vîrardişê şehîdan suc ameyo kerdene. Kurdistanijê ke polîs înan ra wazeno îfade bidî vat ke ma do seba îfadeyî meşirê. Tewrbîyayîşê vîrardişî sucêk nê semedê ma rûmetêko gird o.

Xora yeno zanayene ke polîsê Hannoverî sey polîsanê Tirkan nêzdîyê Kurdan benî. Timûtim bi keyfî erzenê komelanê Kurdan ser. Reyna çalakîyan de zî mudaxeleyê Kurdan kenî. Par çalakîya ke semedê Efrînî ameyêne viraştene de polîsan domanêk hende kuwa ke nêweşxane rê ame wedartene. Gerrekerdişê polîsan zî bê netîce mend. Tena polîsî nê yewîyê dozgerî zî vera Kurdan ê.