Sîyasetê krîmînalîzekerdişî yê dewleta Almanya yê hemverê sembolanê Kurdan dewam keno. Xusûsen polîsê eyaletê Bayernî nê wextanê peyênan de zihnîyetê qedexekerdoxî  yê hemverê beyraqanê YPG/YPJ’yî û fotografanê Rayberê Şarê Kurdî Abdullah Ocalanî fînayo dewre. Polîsê ke paytextê nê eyaletî Munîh de yê nika zî hemverê fotografê Mazlûm Doganî ke sembolêkê mucadeleyê azadîye yê şarê Kurdî yo bêtehemulîya xo ramojnenê.

Pîrozkerdişê Newroze yê hewteyê verênî ke Munîh de virazîyabi aktîvîsto Kurd Azad Yusuf Bîngolî pankartêk ke ser de fotografê Mazlûm Doganî yo ke kadroyanê serkêşan ê PKK’yî ra bi û 21’ê Adare 1982 de zîndanê Amedî de şehîd kewtibi û ser de “Xoverdayîş Cuye ya” nûştebi akerdebî.  Ame zanayene ke aktîvîteye ra dima polîsanê Munîhî bi pêtê jetî fotografê Mazlûm Doganî sey mazaret ramoto û derheqê Bîngolî de cipersayîş dayo destpêkerdene.

‘Zextî Nêeşkenê Bi Mi Çok Bidê Ronayene’

Polîsî îdîa kerd ke bi fotografê Mazlûm Doganî propagandaya PKK’yî ameya kerdene û veng da aktîvîstî ke bêro îfade bido. Azad Yusuf Bîngolo ke verî zî seba ke beyraqê YPG/YPJ’yî akerdîbî erzîyabi serê keyeyê bi rayîrê avûkatê xo hemverê polîsan de prosesê huqûqîyî da destpêkerdene.

Bîngolo ke derheqê cipersayîşê peyênî yê polîsan de hayîdarîyî dayî ANF’yî vat, “Zext û cipersayîşî bi mi çok nêdanê ronayene. Ez veng dana polîsan ke wa hendî cipersayîşanê ke seba ke ez tewrê aktîvîteyan bena derheqê mi de danê destpêkerdene ra fek vera bidê.” Bîngolî vat gama ke ê xo serê adirê Newroze ra eşto a pankarte kirişta û vat, “Mazlûm Dogan Kawayo hemdem o ke xoverdayîşê Newroze dayo destpêkerdene, rixmê qedexe û cipersayîşanê polîsan de ez do  tîya ra tepîya zî fotografê ê bi serberzî bikirişnî.”

Bîngolî da zanayene ke Teşkîlatê Pawitişê Qanûnî ke sazîya îstîxbaratê zereyî ya û Mudurîya Asayîşî derheqê ê de dosyayêk şirawita Daîreya Xerîban a Munîhî û dewamê qiseykerdişê xo de nê vatî: “Gama ke înan fam kerd ke ez hemverê cipersayîş û cezayan de game pey de nêerzena înan derheqê kerdişanê min ê 10 serranê peyênan de dosyayêk şirawite Daîreya Xerîban û waşt ke destûrê mendişê mi bêro îptalkerdene. Ez dima ra pêhesîyaya ke înan fotografêk ke min û cinîya şorişgêre ya Kurde Sakîne Cansize ke 2013 de Parîs de amîbî qetlkerdene pîya antibi sey delîl daxilê dosya kerdo.” 

Bavyera De Zihnîyeto Qedexekerdox Dewre De Yo

Eyaletê Bavyera yo ke Almanya de wayîrê îdareyê tewr muhafezekar û rastgirî yo yewîyê polîsan û mehkemeyî xusûsen kesanê ke YPG/YPJ’yî dir mîyanê paştîdayîşî de yê hedef gênê.  Tewr peynî vizêr aktîvîstê aşitîye Claus Schreero 80 serre seba ke beyraqa YPJ’yî û fotografê Ocalanî estbî û pankarta “Ocalanî rê azadîye” kiriştebî hetê Mehkemeya Îdarîye ya Munîhî ra ci rê 2800 Euro cezaya pereyan amîbî dayene. 

Polîsê Bavyera yo ke xeylî nûmayîşan de kiriştişê beyraqanê YPG’yî kerdo qedexe, kesê ke flamaya YPG’yî yan zî fotografanê şerwananê YPG’yî medyaya sosyale de pare kenê polîs erzeno serê keyeyanê înan. La rixmê zext, cipersayîş û qedexeyan de zî xusûsen aktîvîstê Almanî paştîdayîşê xo yê seba mucadeleyê azadîya Kurdan bi zêdebîyayîşî domnenê.  Nê paştîdayîşî xo raporanê ke hetê yewîyanê asayîşî yê Munîhî ra ameybî eşkerakerdene zî ramotibi.