Nêrazîbîyayîşê verba destsernayîşê şaredarîyanê HDP'yî dewam keno. Parlamenteranê Parlamentoyê Mîyannetewî yê Partîya Sosyalîst a Swîsre (SP) Carlo Sommaruga û Claudîa Frîedle vernîyazêk pêşkêşê parlementoyî kerd. Parlamenteran bal ante serê destsernayîşê şaredarîyanê HDP'yî û Konseya Federal a Swîsre ra waşt ke verba Tirkîya wa tewir bigêro.

Parlamentere Claudîa Frîedle ard vîrî ke hemşaredaranê Wan, Amed û Mêrdînî ê HDP'yî bi hewayêkê bêhuqûqîye wezîfe ra ameyî dûrfistene, herinda înan de qeyûmî ameyî wezîfedarkerdene û hukmatê Swîsre ra pers kerd ke tewirê xo yo verba nê do senî bibo.

Wezîrê Karanê Teberî: Ma Babete Teqîp Kenî

Wezîrê Karanê Teberî yê Swîsre Îgnazo Cassîsî bi hewayêkê fekî cewab da persê parlamentera SP'yî û îfade kerd ke ê dûrfinayîşê wezîfeyê hemşaredaran ra bi hewayêkê biqisawet taqîb kenî. Cassîs eşkera kerd ke ê babete nêzdîye ra taqîb kenî. Wezîrî ard ziwan ke Sefîretxaneyo Pîl ê Swîsre yê Enqere reyde derheqê şaredaran de qisey kerd û vat: "Swîsre bi hewayêkê nizamî veng dano Tirkîya ke goreyê xoserîya huqûqî, qaydeyanê huqûqo unîversalî û berpirsîyarîyanê xo yê mîyannetewî tê bigêre, hurmet bide înan. Konseya Federale zaf ehemmîyet dana ke hukmatê Tirkîya bi hurmetê heqanê merdiman û demokrasî tê bigêro."