Xeylêk şaristananê Almanya de û şaristanê Baselî yê Swîsre de  9 ciwanê ke 2 serrî verî hêrişê nîjadperestî yê Hanauyî de ameybî qetilkerdene ameyî yadkerdene.

Stuttgart de rayberîya rêxistinanê antîfaşîstan de hêrişo nîjadperest ê Hanauyî ame şermezarkerdene. Çalakîye de bale ameye antene ser ke no hêriş hêrişêko peynî nîyo û hêrişê nîjadperestî dewam kenê.

Şaristanê Ulmî de bi çalakîyêka rayraşîyayîşî qirkerdiş ame şermezarkerdene. Çalakîye de ame waştene ke mesuldarê qirkerdişî wa bêrê eşkerakerdene.

Şaristanê Mainzî de serkêşîya Yewîya Wendekaranê Kurdîstanî (YXK) û Cinîyan ê Wendekaran ê Kurdîstanî (JXK) de qirkerdiş bi çalakîyêke ame protestokerdene. Xeylêk girseyî tewrê çalakîye bîyî.

Şaristanê Kolnî de vera qirkerdişê Hanauyî serkêşîya Antîfa de çalakîyêka rayraşîyayîşî ameye kerdene. Rayraşîyayîşî ra dima nawnayîşêk zî ame kerdene. TCŞ, TÊKO-JIN û JXKyî zî nawnayîşêk de eşkerayîye daye.

Şaristanê Baselî yê Swîsre de serkêşîya Torra Paştdayîşê bi Koçberan de çalakîyêke ameye kerdene. Çalakîye de ame vatene ke dewleta Almanya qestî ra qirkerdişê Hanauyî peygoş kerdo. Çalakîye de venga her kesî ame dayene ke vera faşîzm û nîjadperestîye têkoşîno hempar bêro kerdene.

Paytextê Almanya Berlin de hîrê merkezanê şaristanî de mîtîng û çalakîyê rayraşîyayîşî ameyî kerdene. Sere de Meclîsê Cinîyan ê DEST-DANî û Meclîsê Nav-Berlinî xeylêk rêxistinan paştî daye çalakîyan. Çalakîyan de vera qedexeyê serê PKKyî îmzayî zî arê dîyayî.