Riseup4Rojava veng da ke çalakîya blokajî bêra viraştene

Riseup4Rojava vat, "Verê gîşeyanê Rayîranê Hewayî yê Tirkî, Pegasusî û SunExpressî de çalakîyê blokajî do bêrê viraştene, her kes heta ke şer bêro vindertene wa çalakîyêka şexsîye bike."

Kampanyaya mîyanneteweyî Riseup4Rojava (Seba Rojawanî sere wedare!) veng da ke çalakîya blokajî Rayîranê Hewayî yê Tirkî de bêra kerdene.

Riseup4Rojava eşkerayîya nuştekîye de vat, "9'ê Teşrîna Verêne ra nata artêşa Tirkî bi çekanê giranan, teyarayan hêriş kena serê şaristananê Rojawanî/Vakurê Kurdistanî.
Seba ke nê şerî bivindarne û zîyan bide ekonomîyê şerî, kampanyaya mîyanneteweyî ya Riseup4Rojava verba tewiro îşxalkar ê Tirkîya vengdayîşê çalakîye keno. Seba ke hêzê mîyanneteweyî Tirkîya vindarnê, seba naye zî ma vengdayîşê 'Tirkîya rê perayîş çin o' kenê. Mabênê 21 û 26'ê Teşrîna Verêne meydanê teyarayanê mîyanneteweyî yê Rayîranê Hewayî yê Tirkî, Pegasus û SunExpressî de verê gîşeyanê înan de çalakîyanê blokajî bikê. Her kes seba ke şer bivindarne, çlakîyêka şexsîye bide.

Na seferberîya dormegirewtişî dima Rayîranê Hewayî yê Tirkî yê Barselona, Kopenhag, Berlîn, Londra û Baselî de dewam bike. Nê çalakîyan mojnenê ke nawnayîşî têna meydanê teyarayan de bi protestokerdişî nêmanê û eke gîşeyî bêrê blokekerdene, no perayîşan zî bide batalkerdene. Rewşêka winasêne de ke verba şorişê hêrişan ê faşîstan dewam kena, helbet girîng a ke merdim kuçeyan pirr bike û şermezar bike. La reyna girîng a ke merdim xoverdayîşêko global ê verba nê şîrket û dezgehanê ke hetkarîya fînansî danê faşîzmê Tirkî, geş bike. Rayîrê Hewayî yê Tirkî û endustrîya turîzmî lingê girîngî yê ekonomîyê dewleta Tirkî yê. Eke pêroyê gîşeyê cîhanî de bêrê astengkerdene, tedaye do serê rejîmê Tirkî bêra kerdene, zîyan do birese serê endustrîya turîzmî û do bêro dîyene ke pêroyê merdimê cîhanî paşt danê Rojawan."