Kampanyaya ke seba ke PKK lîsteya terorî ra bêro vetene dîyabî destpêkerdene pêro dinya û Kurdîstan de dewam kena. Kampanya Ewropa de hetê temsîlkaranê kurdan ra yena kerdene. Temsîlkaran derheqê babete de ANFyî rê qisey kerd.

Vervatoxa Demkî ya TJK-E Rabîa Baldemîr îfade kerd ke qedexeyê serê PKKyî, qedexeyê serê cinîyan o û vat: ''PKK têgêrayîşê şarî yo, nêbeno ke bêro qedexekerdene, krîmînalîzekerdene. Kampanya de armancê ma yo verên 300 hezar îmza bi. Ma heta nika 140 hezar îmzayî arê dayî. La seba ke nê qîm nêkenê, ma rexneyê xo wazenê. Sey TJK-E ma do bi nasnameyê xo tewrê festîvale û çalakîyan bibê û vera nê qedexeyî îmzayan arê bidê. Ma do asta karê xo berz bikerê.''

Îdarekara verêne ya Komeleya Paştdayîşê bi Keyeyanê ke Merdimê Xo Vînî Kerdê (YAK-DER) Xase Bîngoltekîn Kiliç da zanayene ke ê do seba kampanya xebatanê xo ra tawîz medê û vera na neheqîye vejîyê. Enternasyonele Susanne Rossling zî ard ziwan ke seba ke kurdî û têgêrayîşê azadîye nêrê krîmînalîzekerdene bi hezaran kesan îmza daye kampanya.

Hemserekê KCDK-E Yuksel Koçî vat: ''Ma hînî nêwazenê bêrê krîmînalîzekerdene. Ganî kampanyaya îmzayan biba rojdemê ma yo verên. Ma seba kêmasîyanê xo zî rexneyê xo wazenê. Ma do bi xurtî xebatanê xo bikerê.''

Vervatoxa YJK-E Aytene Kaplan vat: ''Sey cinîyan ê kurdan ma Almanya de bi qîmî îmzayî arê nêdayî. La ganî cinîyî zêdêr wayîrê na kampanya vejîyê ke qedexeyê vera PKKyî yeno manaya qedexeyê vera cinîyan û îradeyê azadî.''

Hemserekê KON-MEDî Engîn Severî vat: ''Ma nêeşkayî na kampanya de rolê xo bi qîmî bîyarê ca. Menga gulane de ma hîna bi xurtî vera qedexeyê serê PKKyî bixebitê û îmzayan arê bidê.''