Rojnameyê Informationî yê Danimarka de bi wesîleya 10ê Kanûna Roja Heqanê Merdiman a Dinya seba azadîya Rayberê Şarê Kurdî Abdullah Ocalanî îlanêk weşanîya û vera tecrîdî nêrazîbîyayîş ame mojnayene.

Îlan de ame vatene ke ganî Abdullah Ocalan bêro veradayene û nê çîyî ameyî parekerdene:

''Ewro 10ê Kanûne Roja Heqanê Merdiman a Dinya yo û seba azadîya Abdullah Ocalanî firsendêko hol o. Qehremanê azadîya kurdan Abdullah Ocalan 15ê sibata 1999î ra nata Zîndanê Îmraliyî de yo.

CPTyî şertanê Îmraliyî ser o tebaxa 2020î de raporêk weşanabi û pare kerdbi ke Abdullah Ocalan şertanê xiraban de tepişîyeno û nêeşkeno teberî reyde têkilîye virazo.

Raporê CPTyî de ame vatene ke na rewşe nêna qebulkerdene û ganî şertê zîndanan ê bînan ê Tirkîya zî bêrê weşkerdene. 7ê tebaxa 2019î ra nata avûkatî nêeşkenê Ocalanî reyde pêvînayîşî bikerê. Ocalanî tewr peyêne 27ê nîsana 2020î de pê telefonî birayê xo de qisey kerd.No çi yeno manaya binpaykerdişê heqanê merdiman û binpaykerdişê Standartê Normalî yê Neteweyanê Yewbîyayeyan.

Meclîsê Parlamenteran ê Konseya Ewropa teşrîna verêne ya 2020î de dabi zanayene ke rewşa Tirkîya hol nêbîya û vera muxalefetî tedayê pîlî estê.''

Îlan de adresê keyepelê Înîsîyatîfê Abdullah Ocalanî rê Azadîye û lînkê kitabanê Ocalanî zî estê.