Aktîvîstê 'Keştîya Azadîye' û doktorê swîsreyîjî Josef Karl Heinrich Savaryî derheqê rolê çareserîye yê Rayberê Şarê Kurdî, paştdayîşê şaran û têkoşînê gerîlayan de ANFyî rê qisey kerd.

Savaryî da zanayene ke o Îtalya de endamê Komîteya Paştdayîşê bi Kurdan o û vat: ''Girîng o ke hemwelatîyê bînî paştdayîşê xo yê bi kurdan îfade bikerê û b taybetî azadîya Abdullah Ocalanî biwazê. Meseleya ke sey meseleya kurdan pênase bena a raşte meseleya tirkan a û mefteyê çareserîya na mesele Abdullah Ocalan o. Coka ganî Ocalan azad bibo. Afrîkaya Başûre de azadîya Nelson Mandela ra dima azadîye ameye destvistene. Semedê Ocalanî zî heman rewşe derbazdar a.''

Savaryî bale ante ser ke Erdogan multecîyan vera Ewropa sey hacetê şantajî şuxilneno coka Ewropa nêwazena Erdoganî hêrs bikera. Savaryî vat: ''Dewletê sey Almanya, Fransa û Swîsre semedê multecîyan pere danê Erdoganî, Erdogan zî pê nê pereyan çekan gêno û nê çekan vera kurdan şuxilneno. Heta ke şarî, rêxistinê komelê sivîlî û partîyê sîyasî bi hêzî teda mekerê Ewropa vera Erdoganî tênêgêrena. Ez bi xo pê hukmatanê Ewropa bawer nêkena. Mabênê înan û Erdoganî de menfaatê hemparî estê.''

Savaryî ard ziwan ke têkoşînê gerîlayan semedê azadîya kurdan û azadîya Ocalanî zaf girîng o û vat: ''Dima ke artêşa Afrîkaya Başûre vera Kuba bin kewte Mandela azad bi. Yanî paştdayîş zî seba têkoşînê çekdarî zaf girîng o.''