Çalakîyê paştîdayîşê grevanê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî yenî viraştene dewam kenî. Vizêr xeylî bajaranê Fransa û Vîyana de çalakîyî ameyî viraştene.

PARÎS

Paytextê Fransa Parîs de Kurdistanijan û dostanê înan semedê wedartişê tecrîdî û bale antişê Leyla Guvena ke 74 rojî yo grevê vêşanîye de ya ser çalakîyêk ameye organîzekerdene.

Çalakîya ke bi vengdayîşê Konseya Kurdan a Demokratîke ya Fransa (CDK-F) û Têgêrayîşê Cinîyan ê Kurdan ê Fransa (TJK-F) ameye viraştene xeylî sîyasedmadarê Fransa û temsîlkarê dezgehan tewrê ci bîyî.

Qiseykerdişan de ame vatene ke Leyla Guvene sînorê mergî de ya û bêvêngîya Ewropa ameye şermezarkerdene.

BORDEAUX

Bordeaux de zî semedê bicaardişê waştişanê Guvene Kurdistanijî û dostê înan meydanan de bî. Çalakîya ke semedê vengdayîşê vengê Guvene ameye viraştene de sloganê ‘‘Waştişê Guvene waştişê ma yê‘‘, “Berxwedan jiyan e”, “Bijî Serok Apo” berz bîyî.

MARSÎLYA

Marsîlya de zî bi heman waştişî rayberîya Têgêrayîşê Ciwanan ê Şorişgêrî de çalakîyêk ameye organîzekerdene. Çalakîye de mesajê ‘Waştişê Guvene waştişê ma yê‘ ame dayene û çalakwanê grevê vêşanîye ameyî silamkerdene.

TOULOUSE

Toulouse de zî bi çalakîyêk bale ancîya grevanê vêşanîye ser û tecrîd ame protestokerdene. Çalakwanî bi slogana ‘‘Waştişê Guvene waştişê ma yê‘‘ xoverdayîşê grevê vêşanîye silam kerd.

VÎYANA

Paytextê Awusturya Vîyana de bi çalakîyêk xoverdayîşê grevê vêşanîye yo ke rayberîya Guvene de ame destpêkerdene ame silamkerdene. Çalakwanan standêk akerd û bi vilawekan derheqê tecrîd û grevî de zanayîş da.