Şaristanê Stockholmî yê Swêdî de vizêr kurdîstanijan û swêdijan bazarîya NATOyî ya serê kurdan bi çalakîyêka rayraşîyayîşî şermezar kerde. Çalakîye serkêşîya Merkezê Komelê Demokratîkî yê Kurdan ê Swêdî (NCDK-Swêd) de, bi şîarê 'Şantajanê Tirkîya rê nê, kurdan mekerê babeta bazarîya xo ya gemarine' ameye kerdene.

Çalakîye de pê pankart û sloganan dewleta tirke û NATO ameyî protestokerdene. Rayraşîyayîşî ra dima mîtîngêk zî ame kerdene.

Mîtîng de verî Hemserekê NCDK-Swêdî Hemîd Amedî qisey kerd û vist vîrî ke kurdan DAÎŞ bin vistbi rixmê ney zî dewleta Swêdî kurdî kerdî babeta bazarîye.

Hemserekê KNKyî Ehmed Karamusî ard ziwan ke peymana mabênê Tirkîya, Fînlandîya û Swêdî hem seba kurdan hem zî seba kurdanê Swêdî peymanêka îxanetî ya.

Wekîla xosere Amînahe Kakabaveh Karamusî ra dima qisey kerd û vat: ''Kurdan serkêşîya YPG û YPJyî de vera DAÎŞî xoverdayîşêko pîl kerd. Heta Ann Lind YPJ bi xo fîraz kerdbi. La ewro Swêd kewto peyê bazarîyanê NATOyî. Ma do qetî xeyalanê awankerdişê Kurdîstanê azadî ra fek vera medê.''

Wekîlê Partîya Çepî Daniel Riazatî vaşt ke vera Tirkîya ambargo nêro wedaritene.

Çalakîye de nameyê Partîya Komeleya Rojhelatê Kurdîstanî ser o mesajêk ame dayene, sloganê sey 'Kiştox Erdogan', 'Swêd nêbo hemkarê kiştox û dişmenanê kurdan' ameyî vatene.

Çalakîye de vera qedexeyê serê PKKyî îmzayî arê dîyayî û vilawekî ameyî vilakerdene.