Sakîne Cansize (Sara), Fîdan Dogane (Rojbîne) û Leyla Şaylemeze (Ronahî) yê ke 9ê Çile ya 2013 de paytextê Fransa Parîs de ameyî qetilkerdene, çalakîya grevê vêşanîye ya bêdem-bêagêrayîşî ya Strasbourgî ya ke 17ê Kanûne 2018î de ameye destpêkerdene de bi aktîvîteyêk ameyî vîrardene.

Aktîvîteya ke şîîrî zî ameyî wendene de çalakwanan ra rojnameger Gulîstan Îke û siyatmedaro Kurd Mustafa Sarikayayî qiseykerdişêk kerd.

Gulîstan Îke vist vîrî ke gama ke qirkerdişê Parîsî ame viraştene hemverê Rayberê Şarê Kurdî Abdullah Ocalanî de tecrîdo giran dewre de bi  û va: ‘‘Ma sey çalakwanê grevê vêşanîye rêçê Sakîne, Leyla û Fîdanan de yê. Leyla Guvene Amed de seba ke hesabê Sara, Rojbîn û Ronahî bêro persayene û tecrîd bêro wedarnayene çalakîya xo rê dewam kena. Ma wazene ke sere de Fransa bêvêngîya heme hêzan ê ke nê qirkerdiş û tecrîdî rê hemparî bişiknê û  rîyê înan o raştî vejê wertê.‘‘

Mustafa Sarikaya zî bala ante ke xoverdayîşê zîndanî yê Sakîne Cansize  hetê her kesî ra yeno zanayene  û va: ‘‘Ez bi xo bi hemraya Sakîne zîndane de nêmenda la tekîlîya ma bibî. Ma pey dêsan ra qisey kerdêne. Wexto ke ez newe ameya tewqîfkerdene ez ameya berdene bi  kogûşê teslîmkerdoxan yo ke kişta kogûşê cinîyan de bi. Rojêk mi embaza Sakîne dir qisey kerd. Mi ra vat ke ‘‘Gama ke ber bêro akerdene ûca ra biremê û reyna zî peyser meşo ûca.‘‘