Wekîla Partîya Sosyalîste Brigette Crottaz menga verêne de derheqê hêrişanê kîmyewîyan ê Tirkîya de persnameyêk dabi hukmatî û bale antbî ser ke artêşa tirke Başûrê Kurdîstanî de çekê kîmyewîyî şuxilnayî.

Hukmatê Bernî cewab da Wekîle Crottaze û pare kerd ke hayîya înan pê çinbî ke dewleta tirke çekê kîmyewîyî şuxilnayê la ê do mesele teqîb bikerê. Hukmatê Swîsre vat: ''Ganî çimdaranê xoseran reyde şuxilîyayîşê çeka kîmyewîye bêro cigêrayene û vera ê kesanê ke goreyê qedexeyê na çeke tênêgêrayê, wa gamê huqûqî bêrê eştene. Wexto ke 2019 de Tirkîya vera Sûrîye têgêrayîşo leşkerî dabi destpêkerdene hukmatê ma no çi sey binpaykerdişê Peymana Neteweyanê Yewbîyayeyan dîbî û rexne kerdbi. Ma venga terefanê şerî danê ke goreyê huqûqî têbigêrê û waranê merdimîye de goreyê nê huqûqî têbigêrê.''

Cewab de ame eşkerakerdene ke selahîyetdarê Swîsre wazenê dewleta tirke goreyê huqûqê mîyanneteweyî têbigêra, waranê heqanê merdiman, heq û azadîyanê bingeyînan de zî mesuldarîya xo bîyara ca.