Têgêrayîşê Cinîyan ê Kurdan ê Ewropa (TJK-E) û Diwanê Hemserekîya KCDK-E da bale ante qirkerdişê sivîlî yê Serêkanîyê yo ke ewro dewleta Tirkî viraşte ser û semedê vejîyayîşê kuçeyan veng da û vat dimayê qirkerdişê sivîlî yo ke ewro Serêkanîyê de ame kerdene ganî herkes vejîyo meydanan.
Eşkerayîyan de ame vatene ke ganî cade şarê Kurdî yê Ewropa û heme hetê demokratî vera hêrişê îşxalî yê dewleta Tirkî yê vera Vakur û Rojakewtena Sûrîye vejîyê kuçeyan û bi çalakîyan paştî bidê şarê Rojawanî. Dewleta Tirkî qij, pîl, cinî camêrd nêvana şarê ma qetil kena û nêeşkenê wina vinderê û mergan temaşe bikerê. Semedê vernîgirewtişê şerî ganî ma pêro pîya cadê vejîyê kuçeyan û hêrişanê îşxalkarîye bidê vindarnayene. Roje roja bi ruhê Kobanê paştdayîşê Rojawanî ya.