3ê tebaxa 2014 de hetê çetayanê DAÎŞî ra Qirkerdişê Êzidîyan ame kerdene. 2021 de seba ke Almanya qirkerdişî nas bikero nizdê 60 hezar îmzayî ameyî arêdayene û Komîsyonê Waştişnameyî yê Meclîsê Federelî rê muracat ame kerdene.  Manga sibate de babete ameye rojdem û dima ra menga hezîrane de Komîsyonê Heqanê Merdiman û Hetkarîya Merdimî de fîkrê pîsporan ameyî girewtene.

Komîsyonê Waştişnameyî yê Meclîsê Federelî waştişê şinasnayîşê Qirkerdişê Êzidîyan qebul kerd û babete kirişte rojdemê Heyetê Pêroyî yê Meclîsê Federalî. Meclîsê de vernîyaz  bi pêro rayan ame qebulkerdene. Seba ke Qirkerdişê Êzidîyan bêro qebulkerdene do vernîyazêko newe bêro amadekerdene û teqdîmê Heyetê Pêroyî yê Meclîsê Federelî bibo.

Serekê Komîteya Hetkarîya Merdiman û Heqanê Merdiman a Keskan Max Lucksî vat: ''Şinasnayîşê nê qirkerdişî seba çareserkerdişê travmaya vera êzidîyan gamêka girîng a. Seba êzidîyan cuyêka azade û asayîye yena waştene.''

Mehkemeya Almanya teşrîna peyêne ya verêne de endamêkê DAÎŞî sûcanê vera êzidîyan ra mehkum kerdbi. No mehkumîyet dinya ser de gamêka verêne bi. Tîmêka taybete ya Neteweyanê Yewbîyayeyan gulana 2021î de pare kerdbi ke derheqê qirkerdişê vera êzidîyan de delîlê qîmî arê dayê.

3ê tebaxa 2014î de DAÎŞî hêrişê Şingalî kerdbî û bi hezaran êzidîyî qir kerdbî, cinîyê êzidîyî bazaran de rotî, kerdî kole. Goreyê doneyanê ke ameyî raştkerdene çeteyanê DAÎŞî tewr tay 5 hezar kesî qetil kerdî û 7 hezar kesî remnayî.