Hêrişê dewleta tirke yê vera Kampa Mexmûrî de 3 cinîyî şehîd bibî. Wekîlanê Danîmarka û Swêdî derheqê serebûtî de eşkerayîye daye.

Wekîla Sosyalîste Amînehe Kakabaveh pê vernîyazêkê nuştekîyî hêrişê dewleta tirke ard rojdem. Partîya Şarî ya Sosyalîste û Lîsteya Yewîye ya Parlamentoya Danîmarka hêrişê dewleta tirke yê vera Kampa Mexmûrî şermezar kerd. Kakabavehe vat: ''Erdogan sûcê binpaykerdişê qanûnan ê mîyanneteweyîyan keno. Tirkîya vera qanûnanê mîyanneteweyîyan Efrîn îşxal kerd, kurdî bêwar kerdî, 15ê nîsane de zî Kampa Mexmûrî ser o bombayî varnayî. Hêrişê Tirkîya vera komelê mîyanneteweyî çalakîyêka terorîste ya krîmînale û provakatîfe yê.

Kakabavehe waşt ke Wezîra Karanê Teberî ya Swêdî hêrişê vera Mexmûrî şermezar bikera û babete bera Yewîya Ewropa û Neteweyanê Yewbîyayeyan. Lîsteya Yewîye û Partîya Şarî ya Sosyalîste zî parlamentoya Danîmarka de hêrişê dewleta tirke yê vera Mexmûrî şermezar kerd. Vervatoxa Têkilîyanê Teberî ya Partîya Yewîya Kesk û Sûre Eva Flyveholm Wezaretê Karanê Teberî ra waşt ke serebût bêro cigêrayene. Hetkarê Serekê Partîya Şarî ya Sosyalîste Serdar Benlîyî zî vat: ''Ganî komelo mîyanneteweyî hêriş şermezar bikero.''