Grevê vêşanîye yê Strasbourgî kewt roja xo ya 24ine, çalakwanî do tewrê rayraşîyayîşê Parîsî yê roja 12ê Çile bibê.

Bi nameyê çalakwanan Dîlek Ocalane eşkerayîyêk daye. Eşkerayîye de nê vajîyayî: “Tewirê Fransa yê qirkerdişê Parîsî ramojneno ke sûcê dewleta Tirkî yê qirkerdişî rê hempar a. Înan bi qirkerdiş waşt ke bawerî û îradeyê ma bicerebnê. Waşt ke ma eşqê Sakîne Cansize, mucadeleyê Rojbîne û umîdê Leyla ra bivisnê. La eksê nê amacê înan de hemrayanê Sara, Rojbîn û Leyla mucadeleyî hîna xurt kerd. Qirkerdişî sey bûmerangêk pey de agêra û da kerdoxan ro.” 

MÎRAZÊ NÊ TÊGÊRAYÎŞÎ DE XEYALÊ AMEYOXÎ YÊ BI DES HEZARAN ŞERWANAN ESTO

Eşkerayîye de nê îfadeyan rê ca dîya: “Înan bajarê ma vêşnayî û raşanayî, ciwanê ma bodroman de gane gane vêşnayî, bedenê bêganî yê şerwananê ma yê cinîyan teşhîr kerdî û goristanê ma tehrîb kerdî. Nika zî waştişanê tewr demokratîkan rê zî bişidet nizd benê. La ê do bi ser nêkewê. Çunke mîrazê nê têgêrayîşî de Sakîne Cansiza ke rîyê celadê xo rê tûk kerdo esta. Hêzê şarê ma û şehîdan esto.

Çunke bi des hezaran mîlîtan û welatperwerê ke Rayber Apoyî ra bawer kenê estê. Şarê dinya yê ke bawer kenê sîstemê modernîteya kapîtalîste ancax bi paradîgmaya Rayber Apoyî yena halkerdene estê. Cinîyê Kurdî yê ke pêrodayîşê Sara, Leyla û Rojbîne hîna kenê xurt estê.”

KESÊ KE ZULMÎ RÊ SERRE RONANÊ DO RÎPELANÊ TOZINAN Ê TARÎXÎ DE CA BIGÎRÊ

Eşkerayîye de ame vîrardene ke Leyla Guvene 63 rojî, Nasir Yagiz 50 rojî, 156 tepişteyê ke zîndanan de yê 25 rojî, Îmam Şîş û ê zî 24 rojî yê ke grevê vêşanîye de yê û nê vajîyayî: “Helbet do no zulm biqedîyo. Saray û serdestîya înan birijîyo. Kesê ke hemverê zulmî de serre ronayê do rîpelanê tozinan ê tarîxî de cayê xo bigîrê. 12ê Çile de rayraşîyayîşê Parîsî de ma do şarê xo reyde ancî sozê xo newe kerê.” Eşkerayîye bi slogananê “ Bijî Serok Apo, Jin Jiyan Azadî û Sara, Rojbîn, Ronahî” qedîyaye.