Şaristanê Bernî yê Swîsre de hetê Yewîya Hêzê Demokratîkî ya Ewropa ra panelê 'Tirkîya de Têkoşînê Demokrasî û Îtîfaqî' ame kerdene. Wekîlê verênî yê HDPyî Demîr Çelîkî moderatorîya panelî kerde, Endama Platformê Yewîya Seba Demokrasî Ayşegule Devecioglu, Serekê Konfederasyonê Yewîya Elewîyan a Ewropa Huseyîn Mat û Wekîla verêne ya HDPyî Sîbele Yîgîtalp panel de qisey kerd.

Panel de verî Ayşegule Devecîoglu qisey kerd û îfade kerd ke Tirkîya de îqtîdar û muxalefet nêeşkenê derdanê şarî rê bibê çare û seba demokrasî tek çare HDP yo. 

Huseyîn Matî pare kerd ke Ewropa de elewîyî wayîrê heqanê xo yê û ê hê meseleyanê elewîyanê Tirkîya teqîb kenê.

Wekîla verêne ya HDPyî Sîbele Yîgîtalp zî qiseykerdişê xo de da zanayene ke vilabîyayîşê demokrasî îtîfaqanê Cumhur û Miletî rê fayde keno û vat: ''Ganî elewî, kurd, cinî, kedkar û pêro terefî yewîya  xo xurtêr bikerê.'' Sîbele Yîgîtalp dima bale ante hêrişanê vera HDPyî, sûcanê vera şarê Efrînê ser.