Ma bi xeyr astereya Zerrîya mi

Ez rew ra wo wazena to rê binusnî. Şima rê binusnî. Hem şima rê binusnî hem şima binusnî. Şima yê ke bîye astereyê welatê qemerî. Çend roj verê mi çend hevalê kanî dî. Ma çend rojan pîya mendîme. Nê çend rojan de babetê sohbetê ma şima bîy. Ma şima vîrîardî. Ma ge huyayme ge berbayme.

Ti rindeke bîya. Ti zaf rindeke bîya. O taw mi qet to ra nêva. Nêbîyêne ke vajî. Ma de rindekîyê nêvajîyênê. Ma de rindekîye amayêne cuyene. Êna cuyene. Ameyêne vînîtene. Êna vinîtene. Eke vajîyo efsun xerepyeno. Mi kî hînî kerd. Bejna to ya derg e, burîyê to yê qelemî, çimê to yê şalên û girsî nika verê çimanê mi der ê. Înan xorîn nîyadênê. Înan zanitênê peyê dîmenî bivînê. Aqlê to yê barî heqîqet nas kerdênê. Zerrîya to ya tenike seba to nêêştênê. Seba şarê kurdî, seba şaran êştênê. Tewr zîyade seba cinîyanê kurd û pêro cinîyan êştênê. To eşkera vatênê; seba ke Rayber Apo cîya nêzdîyê cinîyan beno, mi bawer kerd ke O dostê cinîyan o, hevalê cinîyan o ez bîya PKK yî. Û ti rastî kî bîya PKK yî.

Ti raywanade raste ya na raye bîya. To qet raya xo şaş nêkerde. To bi neniganê xo na raye de, raya xo viraşte. Û ti raye ra şîya.

Ti persker bîya. To her çî hama senê vajîyo, senê nusîyo qebûl nêkerdênê. To verê pers kerdênê. To vatênê gelo? Eke aqlê to yê barî, zerrîya to ya tenike îqna bibîyênê to o taw bawer kerdênê. Zerrîya to hende pake bîye ke aye çi rey ti şaş nêkerda. To tim goş nênê aye ser.

Ti qaqlibaza ke waştênê perrê to biginê hewran bîya. Cêran de firdayîş besê to nêkerdênê. Ti perperika çarine bîya. To waştênê ti biresê sirê adirî. To fir da perrê to ginay hewran ro. Ti reşta sirrê adirî. Ti koyanê Kurdîstanî ra yewe bîya. Ti Ararate bîya.

To verê xo da Botanî. To verê xo da ca û cangeyê qedîmî. Cayê pîr û kalan. Cayo ke dişmenî linge êştbî ver rehet veranêdayênê. Cayo ke şarê xo çi dî çi nêdî destê dişmenî de. O şaro delal. Cayo ke dişmenî zanitênê ke eke uca zîl bido êdî nêşkîno verê şaxan bigêro. Sey xeylê cayanê welatê qemerî ti uca kî raye ra şîya. To uca kî rêçê xo verday. Ti uca bîya bimbarek...