Tayê cinî estê marî benê aşîqê înan. Verê verkan mi bi naye bawer nêkerdênê. Heta ke mi a naskerde. Mi ke a nas kerde ez êdî pê bawer bîya ke marî benê aşiqê tayê cinîyan. Ey hende rindekê ke marî bene aşiqê înan. Leyla cinîya ke marî bîyênê aşiqê ci bîye. 

Leyla rind a roy o

Leyla vara koy o

Leyla awka hêni yo

Gula baxço Leyla.

Mangaya zimistanî de ma des cinî pîya bîme. Zimistan fersend o. Ma do pratîka xo bierjnênîme. Kêmayîyanê xo tespit bikerîme ke ci ra dersan vecêrîme ke pratîkê bînî de reyna mekerîme. Gelîya Azadîye de me. Dişmen nêşkîno pêyatî bêro na gelîye. Eke biwazo bêro bi helîkopteran gerek e eskeran bîyoro serê tumê tewr berzî de birono û hînî operasyon bikero. Xora zimistanî de bin ra nêşkîno bêro. Eke zimistanî de bêro eskerî serdî ra bimirê. Aye ra yo ke gerilayî ca û cangeyanê nîyanên ra vanê gelîyê azadîye. 

Sey her rojî verê ke zerq bierzo ma wuştîme ra. Ma mangaya xo serûber kerde. Nîştîme ro pawayê tîjî mendîme. Ma xo hazir kerdbî têkaleke de nîştbîme ro. Ez  kîşta Leyla de nîşt bîme ro. Ge ge vinike ameyêne mi û şîyêne. Seba ke hewn çimanê mi ra vecîyo ez wuşta lingan ser o. Tayê nata bota ameya şîya. Demêk pey ra şîya reyna kîşta Leyla de nîşta ro. Ez seke nîşta ro mi sereyê xo kerd berz çiranganê manga de nîyada. Ez çi bivînî. Yewêde sîya, qalind û derg hawo çimê xo verdayê Leyla Leyla de nîyadano.  Xo pilosno dîrega çirangan ra Leyla de nîyadano. Rast e rast çimê xo verdayê Leyla Leyla de nîyadano. Ez pêşaş menda. Mi zereyê xo de“Nê zimistanî de no mar” va. Mi çimê xo mîşt dayî mi va beno ke mi xeyal dîyo. Mi çimê xo kerdî ya hawo uca yo. Bi vengêde zaf nizm;

“Hevala Leyla hêdîka sereyê xo bike berz çirangan de nîyade.” Leyla;

“Se bî?, Çi esto? Leyla sereyê xo kerd berz nîyada. Nîyada la Leyla de reflex sifir o. Hînî rast ti vana qey Leyla dostê xo yo bi serran dîyo. Hende rehet a. Mi bi vengêde qisawetin;

“Hevala Leyla ma ti nêvînena. Nê zimistanî de no çi mar o?”

Leyla rîyê xo çarna mi bi bişirîn;

“O marê min o. Xo têkîlê ey meke.”

Mi va ya tayê cinî estê marî benê aşiqê înan. Ê bêmerg ê.