Cinîya ke verî sey homaye averbî  hêdî-hêdî xoserîya  ci ra ameye qerifnayene û  ameye bêqiymet û bêîradekerdene. Hetêkî ra sey her wextî zextê dewlete û hetî bînî ra zilm û zordarîya camêrdan cînîyî raştîya ci ra vistî dûrî û fînaye xizmetê camêrdî.  Cinîyê ke ne kitabanê bimbarekan ne zî sîstemê serdestan de cayê înan esto, qederê xo yê sîyayî rê ameybî razîkerdene.

Verênan vatêne ''Eke  raşt gerîyena de, qey şikîyaya''. Bi vatişê bînî eke rewşa xirabe heyna bena hole, qey hende xirab bîya. Dadî û pîrikê ma  zî goreyê nê vatişî têgêrayêne û bindestîye sey qederê xo vînayêne.

Dadîyê ke camêrdî bi xo anê dinya, hetê camêrdan ra înan rê rolê koletîye amebi fasilnayene. Zerîya vîstanê koletîye de ameybî hepskerdene. Nê dayîkanê ke heme barê dinya ermayanê xo ser o kiriştêne, bi şitê helalî û areqê çareyî kênayê delalî pîl kerdî.

Kênayê dayîkanê kedkeran û erjîyayan, înanê ke nêwaştêne qederê dayîkanê xo biciwîyê zanayene ke yewna cuya mumkun a. Nê kênayanê ke boya azadîye girewtbî, qerardar bî ke vîstana sîyaye ya koletîye ke dîyaya dayîkanê înan ro, do serê înan ra bidernê û vejê. Kênayan ke waşt şikteyî raşt bikerê vat ''Heta ke lêl mebo, zelal nêbeno'' û  vera sîstemê camêrdan sere dart we.

Bado ke têkoşînê azadîye yê kurdan sey ruhê ganîbîyayîşî her ca de vila bi, Dayîkan û kênayan zî cayê xo bedilna. Hinda kênayî rayîrê xelisnayîşî mojnenê dadîyanê xo ke wa herra koletîye xo serî ra bişanê ra. Dadîyan emrê xo sey koleyî ravêrna la kênayê ke înan kerdî pîl, ewro qederê înan bedilnenê.

Merdimo zanyar o ke sey gavarê awe rayîrê azadîye yê cinîyan akerd, cinîyan rê vano ke cayê şima têna keye nîyo, şima gerek her ca de bî û wayîrê qale bî. Senî ke awe hêgayî kena zergûn, hîşmendîya azadîye zî ruh da cinîyan ke înan xo newe ra aferna. Dadîyanê ke verê camêrdî de pê vengê berzî  qale nêkerdêne, ewro meydanan de vera camêrd-dewlete bi vengê berzî qîrêne û  vanê ma estê, ma her ca de yê. Kênayan û dadîyan paşta xo şaya pê û  herra xo ya bimbareke kalûn û kulbe kenê ke dişmenî ra pak bikerê.

Dadîyan rixmê heme zehmetîye kênayê xo sey vilikanê koyê kerdî pîl. Vilikê zaf renginê ke bi boya cîya cîyaye viriskîyenê û vera va û şîlî şepalî  payra manenê. Nika nê kênê ke sey vilikan koyan, dewan û bajaranê welatî xemilnenê zerrîya înan dayîkanê înan ra wirax a ke mîrê înan bi heskerdişî mîraz kerdo. Dadîyî zî pê kênayanê xo sereberzê ke qederê sîyayî yê welat û şarê xo bedilnenê.