Reyna hêrişê tirkan yê vera kurdan rojdem de yo. Çend rojî ser o yeno qalkerdene û dima senî ke çîyêk nêbîyo kerdişê hêrişkaranê cayê înan de maneno û no zî verê hêrişanê bînan akeno. Kurdê ke Sakarya de raştê hêrişê nîjadperestî ameyî ne verên ne zî peyên ê. Nê hêrişî plankerde yenê kerdene. Hêrişkarî seba ke serdestîya xo ramojnê hêriş kenê. Goreyê înan dimayê nengçînayîş û heqaretanê înan gerek kedkaranê kurdan milê xo çewt bikerdêne û vera naye vengê xo mevetayêne.

Rolo ke dewlete kurdan rê fasilnayo şarê tirkî zî qebûl kerdo. Xora problem zî no yo. Goreyê înan kurdî bindest û koleyê înan ê. Kurdanê serewedartoxan rê tehemule înan çîno. Cayo ke kurdê kedkarî tede yenê pêser nameyo ci sey 'bazarê kutikan' nayo pa. Têna no qewimîyayîşî îzeh keno. Hela ke hêriş kerdo zî bi vatişê 'ma do şima bivêşnê' tehdît kerdî. Eke ê lezabeze ûca ra mevejîyayene beno ke vêşnayene zî. Xora no çiyêko newe nîyo. Vêşnayîşê merdiman gureyê înan o.

Verênan vatêne 'leyîrê marî bê axûyî nêbeno.'Sîstemo ke bi dişmenîya kurdan payra yo, bêşik o ke şarî ser o zî tesîr keno. Şaro ke her roje vîneno ke  îdarekarê dewlete senî kurdan rê hêriş kenê, xo rê zî naye sey heqî vîneno. Tecawuz û hêrişî sey wezîfeyê xo hesibneno. Zano ke dewlete peyê paşta înan de ya. Hukmato ke destûr nêdano şarbikê kurdan ra darû  bêro şimitene, şarî axû keno û komelî kaşî ra leyr keno.  A lapata ke ûca dîyaye kênaya kurde rê zî lapetê îqtîdarî bî. Îqtîdar bi polîtîkaya xo ya leymine keno ke hêrişê winayên bêrê kerdene. Herinda hesabpersayîşî de hêrişkarî timûtim yenê pawitene.

Tirkî sey hukmat û şarî fekkê xo ra hadîsan û ayetanê kitabê bimbarekî war nêdanê. Ayet û hedîsê ke qala heskerdiş, parekerdiş, holîye û rindîye kenê, înan sey vînceleyî cawenê erzenê. Raştîye de sey her çiyê înan no zî qele de yo. Çiyo ke vanê, qale de maneno. Ê her çiqas dirîye bikerî û têq hêrsê xo yê vera kurdan binimî zî, kurdan bifatisnê rehet nêbenê. Coka her firsat de hela ke çimê înan pê birneno hêrişê kurdan kenê. Qic-pîl, cinî-camêrd nêvanê darbê mergî danê piro û  kînê xo yê vera kurdan fînenê çiman ver. Xora ê tersûnek ê heta ke paşta înan mehkem nêbo hêriş nêkenê. Coka hela kurdî şine bajar û dewamê înan, ûca hêriş kenê.

Nê hêrişê ke bi destê dewlete yenê kerdene hukmatî ra zafêr hetê paştgeranê înan ra yenê nimitene. Xeylêk hetê ke xo sey demokratan name kenê hêrişê vera kurdan sey vera 'kedkar' û 'karkarê serrewaxtî' name kerd. La pêro sey nameyê xo zanê ke sey hêrşanê verînan no zî vera kurdan bi. Heta ke ê  kerr, kor û lalî kay bikerê û neheqîya ke kurdan rê bêna nêvîne û vera ci bi vengê berzî meqîrê, înan dir waybiratîye caverde cîranîye zî nêbena.