Mi nuşteyê xo yê verênî de qala ci kerdbi ke senî yewîya neteweyîye bîye meseleya 'verêne' ya kurdan û masaya yewîye neteweyîye îşxal bîye, na masa bîye çeka planêke û mesele senî vurîya rewşêka zehmete.

Nê babetan de meseleya PDK-ENKS hîna bena giranêr. Masa de tay waştişê PDK-ENKSî beno sebeb ke rîskî bivejîyê meydan û senaryoyanê xiraban kenê raştikên. A raşte zî safhaya diyîne ya xebatanê yewîya neteweyîye de artêşa tirke dest pê hêrişê topyekûnî kerd ke eşkera yo ke Hukmatê Başûrê Kurdîstanî zî nê hêrişan tesdîq keno û tede barê ci esto. 

Ferzkerdişê parekerdiş û îqtîdarê di perrî

Ma pêro teqîb kerd ke prosesê safhaya yewîne mabên da. No 'mabên' çita bi? Pêvînayîşan de senî yew rol kay kerd? Nê mabênî de ENKSî qewimîyayîşî ercnayî, PDK û Tirkîya de pêvînayîşî kerdî. ENKSî îfade kerd ke destpêkî ra nata nê hezî sey pabesteyê PYDyî dîyî. Coka ferz kerd ke PYDyî reyde pêvînayîş bikero. No hesab heman wextî de 'parekerdişê' şorişî de do rol bigêro.

ENKS eke Îdareyo Xoser hêzê sîyasî, ekonomîk û leşkerî  esasê demokratîkî ser o mabênê nê partîyan de vila bikero parçebîyayîşê nê hêzî do bigirewtêne binê garantî. Senî ke Başûrê Kurdîstanî sey PDK û YNK di pare bi, şoriş zî bi heman hewayî do bibîyêne. Seba Îdareyê Xoserî yo ke gamêke apey nêeşte, na mesele ameyêne manaya meseleya bingeyîne. ENKSî hêzê ke tewrê pêvînayîşî bîyî qebul kerdî û vat 'la.' No 'la' seba parekerdişî bi.

Tênaveradayîşê kurdan

Mesleya bîne ya pêvînayîşan zî înkarê ruhê Şorişê Rojawanî bîye. ENKSî waşt ke şarê erebî û herêma ereban bêrê peygoşkerdene û şarê kurdî û herêma kurdan ser o bêro vindartene. Rejîmê Esadî zî sey ENKSî fikirîyayêne. Rejîmê Esadî prosesê pêvînayîşan teqîb kerdêne û qebul nêkerdêne. Rejîm herêma Rojawanî ra ke pêro şarî tede yê ra zêdêr qerqilîyeno. ENKSî bi nê hawayî Esadî rê zî holîye kerde.

ENKSî qebul nêkerd ke pê weçînayîşî daxîlê îdareyê Rojawanî bibo. Pê fekê xo ard ziwan ke bi nê hawayî Îdareyo Xoser o nikayên o ke şarê erebî û şarê bînî paştî danê ci do ser bikewo û coka ê weçînayîş qebul nêkenê. 

Di meseleyî ameyî taloqkerdene

ENKSî îfade kerd ke ê do îtîfaqê xo yê Tirkîya ra do fek vera nêdê. Têna pê israrê hêzanê mîyanneteweyîyan ê 'çimdaran' qebul kerd ke babete do nîqaş bikerê. Bi nê hawayî na mesele zî taloq kerde. Bateta 'Pêşmergeyanê Roje' zî bi nê hawayî ameye taloqkerdene ke seba ENKSî nê madeyan ra yo ke do tira fek vera nêdo.

Kurdîstanî ra dûrvistişê Rojawanî

Reyna ENKSî waşt ke aktîvîstê ke ENKS ci rê vano 'PKKyîj' wa Rojawanî ra bêrê vetene. Nê aktîvîstan verê cû PKK de ca girewtbi, wextê Şorişê Rojawanî de pê vengdayîşê Ocalanî parçeyanê bînan ê Kurdîstanî û Ewropa ra tewrê xebate bîyî.  ENKSî na babete seba safhaya diyîne verdaye la bêgûman terefan zana ke no waştiş hetê Tirkîya ra amebi ferzkerdene.

Nê pêro astengî yê ke ENKS, PDK û Tirkîya xebatanê yewîya neteweyîye de ferz kerdî.

Peyman û eşkerayîya hempare ya Partîyanê Yewîya Neteweyî ya Kurdan (PYNK) û ENKSî seba xebatanê yewîya neteweyîye hêvî danê. Têna 'la'yê ENKSî û tewirê PDKyî yê vera hêrişanê serê Başûrê Kurdîstanî astengî yê ke verê safhaya diyîne de vindenê.

Seba Îdareyê Xoserî û QSDyî rexne

Nika nê xebatî bi hawayêkê girewteyî yenê kerdene la no raşt o? Eke raşt o çendek raşt o? Na babete de seba Îdareyê Xoserî û selahîyetdaranê QSDyî zî rexneyêk eşkîyeno bêro kerdene. Beno ke tay hetê nê prosesî girewte bibê. La raştî na ya ke ganî no proses bi hawayêkê hîna zelalî, şarî rê û parçeyanê bînan ê Kurdîstanî rê akerde bêro caardene.