Tepişteya sîyasîye ya kurde Zeynebe Celalîyana ke 15 serrî yo zîndanê Îranî de yena tepiştene, raştê zextan yena, surgunê zîndananê cîya cîyayan bena, keyeyê ci reyde nêeşkena pêvînaşî bikera, derheqê 8ê Adare Roja Cinîyan ê Kedkaran a Dinya mektûbêk muşt. Zeynebe eynî wextî de qala îşkenceyê Zîndanê Îstîxbaratî yê Sepahî yê Kirmanşahî kerd.

Mektûbê Zeynebe Celalîyan wina yo:

''Ez 8ê Adare dayîka xo, cinîyê ke rayîrê heskerdoxanê xo pawenê û heme cinîyan ê dinya rê fîraz kena. Tarîxî ra nata cinîyê azadîwaştoxî tim vera rejîmanê dîktarorîye şer kenê û nê cinîyê jîhatî pê gonîya xo tarîxî de cayê xo genê. Ey zalimî biewnê, şima nêvînenî; şima nêeşkenê pê qirkerdiş, îşkence û hepskerdişî ma cinîyan vindarnê. Eke yew cinîye kewte rayîrê azadîye hinî qet yew zext nêeşkeno aye peyser açarno.

Gama ke ez destê zalimanê Komara Îslamî de bîya, mi no hîs kerd. Kincê mi serê mi de dirîyayî, çimê mi ameyî girewtene, dest û lingê pê zînciran ameyî girêdayene û ez raştê îşkenceyanê giranan ameya. Qorê mi îşkenceyî ra masayî û birîndar bîyî. Mi hende dej antêne ke hinî hîs nêkerdene. Vucudê mi bibê kung, mi hinî vucudê xo kontrol nêkerdêne, şapîkê mi bîyî hî.

Înanê ke mi rê no îşkence kerd ez înan bi şexsî nas nêkena. Ey vîjdanê ke aye bîyî, şima heqdarê ke înan sûcdar bikerê. Merdimî têna azadîye û seycîyeyîye wazenê.  Înan sûcdar bikerê. Ez des serrî verî wina nêbîya, îşkenceyan ra wina bîya. Gama ke îşkencekaran mi îşkence kerdêne mi rê çîyo ke mend fikr, bawerî û hêvîya mi ya têkoşînê cinîyan bi. Dejê mi pê nuştişî nînê ziwan. Mi têna qala qismêkê nê îşkenceyan kerd. Ez hêvî kena ke heme cinîyî bibe azad.

Ge-ge ez fikiryena ez çayê dinya de ya, yan zî çayê zemanî de menda. Ez çend cehd bikerî zî, ez do rayîrêk mevînê. No heqê min o? Înfazê hemwelatîyan û merdimanê xo rê şahîdbîyayîş û nefes nêgirewtiş? Şer, hêrs, dirîyîye, cînayet, îşkence wextê tewr normalî de benê û semedê her sûcê zalimî sebabê ci estê ke semedê mi çîyo tewr dej no yo. Ey cinîyê qehreman û fedakarî, çîyo ke adir teredut keno vajê. Ez semedê çewî mergî nêwazena, semedê zaliman zî. Ma pêro pîya têkoşîn bikerê û zaliman welatê xo ra bifetilnê. Seba ke cinîyê ke siba do cuyeya xo vînî bikerê ma înan ra meşerme, ganî ma têkoşînê xo pîlêr bikerê. Ganî ma semedê azadîye seycîyeyîye bedel bidê.

Ez Zeynebê Celalîyan; ez cînîya kurde ya ke zîndananê Komara Îslamî de bi seyan îşkenceyan rê bîya şahîde, raştê îftîra, wurdivînayîşî, îşkence ameya. Tewr xirab zî înfazê des embazanê xo rê bîya şahîde. Naye ra pîlêr dej esto?  Nê zalîmî têna wazenê ez pîşman biba. Mi hende îşkence û zulm dî vera nînan ez ganî senî tobe bikerî? Bawer bikerê, zalîmî çend zulm û îşkenceyî bizêdînî ez dahîna bena jîhat û xoverdayoxe.''