Çewlîg de daristananê Karacehenemî de birnayîşê daran dest pêkerd!

Çewlîg de daristananê Karacehenemî de bi bahaneya 'asayîşî' birnayîşê daran dest pêkerd. Wekîlê HDPyî yê Çewlîgî Erdal Aydemîrî vera ney nêrazîbîyayîşê xo mojna û vat: ''AKPyî reyna dişmenîya vera xoza mojnaye.''

Çewlîg de erazîyê bi 35 hektaran daristananê Karacehenemî de darî bi bahaneya 'asayîşî' birîyenê. Wekîlê HDPyî yê Çewlîgî Erdal Aydemîrî derheqê babete de PÎRHA rê qisey kerd.

Aydemîrî da zanayene ke daristananê Karacehenemî yê qezaya Kanîreşî de vizêr birîyayîşê daran dest pêkerd û bale ante ser ke no erazî qasê 50 sahayanê sporî yo.

Aydemîrî vat: ''Ma eşnawit ke hayîya dewijan pê nê birnayîşî çin a û ê nêwazenê darî birîyê. Awa şimitişî ya merkezê Çewlîgî dewa Kurikî ya Kanîreşî ra peyda bena û na awe nê daristanan ra yena. Hetê bînî ra birnayîşê na daran Çewlîg de bi hawayêkê cidî do bibo sebebê vurîyayîşê awhewayî. Coka awa şimitişî ya Çewlîgî tehlukeyêkê pîlî reyde têrî yo.

Meclîs de semedê peymana awhewayî ya Parisî pêvînayîşî yenê kerdene la Çewlîg de darî birîyenê. Na rewşe hişmendîya AKPyî reyna eşkera kena. Na hişmendîya AKPyo ke dişmenê xoza yo ancî kifş bîya.''