Baroyê Amedî bi wesîleya Roja Ziwanê Dayîke ya Mîyanneteweyîye vizêr Salona Tahîr Elçîyî de panelêk serûber kerd. Nuştox Selîm Temo, nuştoxe Nadîre Guntaş Aldatmaz û avûkat Mehmet Emîn Aktar sey panelîst beşdarê panelî bîyî.

Nuştoxe Nadîre Guntaş Aldatmaz Dêrsim de seba tezê xo derheqê xebitnayîşê kirmanckî yê mîyanê nesîlan de xebata cigêrayîşan kerde. Aldatmaze netîceyê xebata xo ercnayî û ard ziwan ke kirmanckî binê rewşêka bitehlûke de ya. Aldatmaze vat: ''Netîceyê anketan mojnenê ke mabênê ciwanan û kalanê 50 ra pîlêran de hetê qiseykerdişê kirmanckî ra cîyatîya pîle esta. Ciwanî hema hema tewr kirmanckî qisey nêkenê. Destê ma de doneyê seba xebitnayîşê kirmanckî çin ê, coka ma cigêrayîşanê UNESCOyî seba xo referans gênê. Xebatanê peyênan ê anketan de ma dî ke ciwanî babîyanê xo reyde ney, hîna zêdêr dadîyanê xo reyde kirmanckî qisey kenê. No mojneno ke cinîyî seba aqîbetê ziwanî cayêkê senî girîngî gênê.''

Nuştox Selîm Temoyî zî vist vîrî ke ganî kurdî ziwanê xo sey parçeyêkê ruhê xo bivînê.

Avûkat Mehmet Emîn Aktarî zî ard ziwan ke ganî her kurd seba perwerdeyê bi kurdkî muracatê mehkemeyanê mîyanneteweyîyan bikerê û seba nê heqê xo têkoşîn bikerê.

Panelî ra dima mezunan rê sertîfîkayê kursê ziwanî yê Baroyê Amedî ameyî vilakerdene.