Hemserekê Pêroyî yê DEM Partî Tulaye Hatimogullari û Tuncer Bakirhan Hatay de tewrê têhetameyîşê şarî bîyî. Temsîlarê rêxistinanê komelê sîvîlî zî tewrê têhetameyî bîyî.

Hemserekê Pêroyî yê DEM Partî Tuncer Bakirhanî ke tîya qisey kerd nê vatî: ''Hatay felaketa erdlerzî ciwîyala hema nêameyo înşakerdene. Êyê ke vanê Tirkîya  aver şina tîya darbanê şarî bipêşê dahîna hol beno. Şar hema konteyneran de ciwîyeno. Ma veng danê îqtîdarî ke wa darbanê şarî bipêşo.

Sûrîye de rejîm bedilîya la eke o rejîm kurdan nas mekero nêeşkeno bibo rejîmo demokratîk. Bi tehdîtkerdiş û qetilkerdişê elewîyan şima nêeşkenê rejîmê demokratîkî pê bîyarê. Ganî heme bawerî û nasnameyî bêrê naskerdene ke hûzûr bêro Sûrîye. Kurdan Rojawan de vera DAÎŞî şer kerd û azad ciwîyenê. Eke nika Sûrîye de rejîmo newe yeno ganî statuyê Rojawanî, kurdan nas bikero.''

Bakirhanî bale ante pêvînayîşê bi Rayber Apoyî ser û wina vat: ''Heyetê ma  Birêz Ocalanî reyde pêvînayîş kerd û dima ra heyetê ma partîyanê sîyasîyan reyde pêvînayîşan keno .Eke Tirkîya de haştîye bibo Sûrîye de zî haştîye yena.  Ekonomîya Tirkîya seba ke kurdî heqê xo megîrê ameye şuxulnayene. Seba ke bi trilyon dolarî şerî rê ameyî şuxulnayene kedkar zî feqîr mendê.

 Ma sey kurdan û elewîyan hinî nêwezanê çew ma îdare bikero, ma wazenê azad biciwîyê. Eke ma bibê yew Rojawan beno wayîrê statuyî, elewîyî azad ciwîyenê, kilîdê Îmraliyî beno a û Birêz Ocalan şaranê Tirkîya dir yeno têhet. Eke şima wazenê pêvînayîşê bi Birêz Ocalanî biaçarîyê prosesê çareserîye, ciwanê kurdan memirê, bi triyonan dolarî semedê şarî bêrê şuxulnayene. Ganî ma vengê xo dahîna bikerê berz.''