UNESCOyî pêşnîyaz kerd ke bircê Amedî û Baxçeyê Hewselî yê ke hetê dewleta tirke ra ameyê rijnayene, bikewê mîyanê 'Lîsteya Mîrasanê Dinya yê ke Binê Tehlukeyî de yê.'

Birc û xeylêk bînayê tarîxî yê Sûrî binê nameyê 'îmarî' de ameyî xerakerdene û herinda înan de bînayê betonarmeyî virazîyayî.  

UNESCOyî nînan ser o raporêk amade kerd û rapor de qala xerakerdişî kerd. UNESCOyî îfade kerd ke ganî birc û baxçeyê Hewselî mîyanê lîste de cabigêrê û bi nê hawayî bipawîyê.

Wina pawîyeno ke pêşnîyaz kombîyayîşê Merkezê Mîrasê Kulturî yê 9ê êlule de paytextê Arabîstana Suûdî Rîyad de do qetî bibo.