Yeno waştene ke dewa Ekîrekî ya Çemişgezekî de ocaxê madenî bêro akerdene. Dewije Sultane Gulbez vera projeyî nêrazîbîyayîşê xo mojna û vat: ''Ma dewa xo de maden nêwazenê. Eke maden bêro ma nêeşkenê heywankarîye û zîretî bikerê.''
Dêrsim de her roje yew ocaxê madenî yeno akerdene. Dêrsim de nika 145 projeyê madenî est ê û temamîyan Koyanê Munzurî sey warê madenî ame îlankerdene.
Dewa Ekîrekî ya qezaya Çemişgezekî ya Dêrsimî zî sey warê madenî ameye îlankerdene. Dewije Sultane Gulbez derheqê babete de PÎRHA rê qisey kerd.
Sultane Gubez ard ziwan ke ê wazenê dewa xo de biciwîyê û dewe de maden nêwazenê. Sultane vat: ''Ma tîya de heywankarîye, hingdarîye û zîretî kenê. Eke dewa ma de maden est bo ma nêeşkenê tîya de biciwîyê. Darê ma vêşenê, erdê ma de ocaxê madenî abenê la çew wayîrê ma nêvejîyeno.
Serra 1994î de ma nê çîyî dîyî, bomba û madeyê kîmyewîyî erzîyayî tîya. Ma wazenê tîya de biciwîyê. La eke tîya de maden est bo nêweşîyî zêdîyenê. Domananê ma zanîngeh qedînayo. Kar çin o coka ê do bêrê dewe de heywankarîye bikerê. Coka ma dewa xo de maden nêwazenê.''
