Vakurê Kurdîstanî de 4 mengan o her roje daristanî vêşenê. Şewatê Xozatî bi xo netîceya operasyonê leşkerî de dewanê Danzî, Kurukaymak û Koçerî  dest pêkerd û 11 rojî yo dewam keno. Walîtîye îdîa kena ke erdî ra şewat nêno hewnakerdene. Roniştoxanê Xozatî rê zî herême qedexe yo. Besta de zî şewato ke leşkeranê tirkan vet dewam keno û destûr nêdîyeno ke bêro hewnakerdene.

Dewa Mêhrîna ya herêma Besta ya Şirnexî de netîceya bombardumanê hewayî de adir kewt daristanan. Semedo ke na herême 'qedexekerde' ya, destûr nêdîyeno ke kes şewat hewna bikero.

Sey polîtîkayêne vêşnayîşê daristanan wextê Serewedaritişê Şêx Seîdî yê 1925î de dest pêkerd, dima wextê Terteleyê Dêrsimî û Rewşa Îstîsnayîye de zî şewatanê sîstematîkan dewam kerd. Goreyê qeydêkî mabênê serranê 1990-2008î de 300 daristanî, 9 hezar û 100 hektar daristanî vêşa. Qedîyayîşê prosesê çareserîye ra dima Cûdî de şewat dest pêkerd û xeylêk waran de dewam kerd. Nê şewatî Mudirîya Daristanan de yan zî medyaya tirkan de nêweşanîyayî. 

Rewşa 3 mengan ê peyênan 

20ê Tebaxe: Koyê Gomanî yê qezaya Şemzînanî ya Colemêrgî de 15ê tebaxe de şewat vejîya, 4 rojan ra dima xo bi xo hewna şi. Bi hezaran darî vêşayî.

19ê Tebaxe: Koyê Cûdîyî yê herêma Zêre Kêrê de şewat vejîya û vila bi.

17ê Tebaxe: Adir kewt Koyê Cûdîyî yê herêma Girêhirmoyî û şewat nêame hewnakerdene. Xo bi xo hewna şi

16ê Tebaxe: Qezaya Mîdyadî ya Mêrdînî de dewa Batê de şewat vejîya û vilayê dormeyî bi.

6ê Tebaxe: Qezaya Licê ya Amedî de dewa Şêxan de şewat vejîya û nêama hewnakerdene.

5ê Tebaxe: Qezayanê Tillo û Berwarî yê Sêrtî de şewat vejîya û leşkera nêverda şar şewat hewna bikero. Israrî ra dima şarî şewat hewna kerd.

4ê Tebaxe: Dewan Gundik Remoyî yê Koyê Cûdîyî de şewat vejîya û şewat vila bi.

4ê Tebaxe: Qezaya Xozatî ya Dêrsimî de 30ê temmuze de netîceya operasyonê leşkerî de dewanê Derekoy û Gedîklî de şewat vejîya. Warêko pîl şewat de bii wele.

3ê Tebaxe: Taxa Yeşîltepe ya qezaya Pîranî ya Amedî de şewat vejîya û rojan ra dima ame hewnakerdene.

30ê Temmuze: Walîtîye derheqê şewatanê Cûdî, Gabar û Besta de eşkrayîyêke daye û şîyayîşê nê herêman qedexe kerd.

29ê Temmuze: Şewatê herêma Şenyayla ya Mûşî 7 rojan dewam kerd û herême ameye qedexekerdene.

 20ê Temmuze: Cûdî de bombardumanî de şewat vejîya û nêame hewnakerdene.

17ê Temmuze: Herêma Besta ya Şirnex de 12ê temmuze de netîceya operasyonê leşkerî de şewat dest pêkerd û dima vila bi. Bombardumanan ra zî şewat bi pîlêr.

15ê Temmuze: Qezaya Hezexî ya Şirnexî de warê Dehla Şêxî ya qeraxê Çemê Dîcle de netîceya bombardumanî de şewat vejîya. Şewat pê mudaxeleyê roniştoxan ame hewnakerdene.

5ê Temmuze: Taxa Kerwasî ya qezaya Licê ya Amedî de 13ê temmuze de keyeyanê Kume de şewat dest pêkerd û warêko pîl ê taxa Lîcokî vêşa. Wextê şewatî de 4 helîkopterî herême ser o gêrayêne.

1ê Temmuze: Qezaya Farqinî ya Amedî de daristanê Haci Çerkezî vêşa. Şar pê îmkanê xo mudaxeleyê şewatî kerd.

29ê Hezîrane: Qezaya Omeryanî ya Mêrdînî de dewa Mercî de şewat vejîya û şewat resa dewa Kurikî zî.

28ê Hezîrane:Waranê Girêgivavra, Besta Hincê, Germav û Kanîfeşkî yê Besta de şewat vejîya. Operasyonê leşkerî ra şewat nêame hewnakerdene.

26ê Hezîrane: Şewatê qezaya Dara Hênî ya Çewlîgî dewanê Guzeldere, Derebag, Çamliyûrt û Sogûkpinarî ra vila bi. Şewatî 20 rojan dewam kerd. Her serre heman warî de şewat vejîyeno.

20ê Hezîrane: Koyê Cûdîyî de adir kewt daristanan. Semedê hewnakerdişê şewatî çîyêk nêame kerdene.

17ê Hezîrane: Operasyonê leşkerî ra dima taxa Pîrejmanî ya qezaya Pîranî ya Amedî de 1ê hezîrane de Koyê Gorese de şewat vejîya. Şewatî 13 rojan dewam kerd û vilayê qezaya Arica ya Xarpêtî bi. Netîceya şewatê 13 rojan de Koyê Gorese bi wele.

17ê Hezîrane: Dewa Horî ya Bedlîsî de bombardumanî ra şewat vejîya. operasyonê leşkerî de  şewat vila bi.

15ê Hezîrane: Taxa Pinarcikî ya qezaya Omeryanî ya Mêrdînî de daristanî vêşayî. Şewat de 200 donim war vêşa.

13ê Hezîrane: Koyê Gabarî yê qezaya Basanî yê Şirnexî de dewa Zêwê de şewat vejîya. Heman wextî netîceya bombardumanî de xeylêk cayan de şewat vejîya.

12ê Hezîrane: Taxanê Su Çati û Soganli û deweka Ulu Çinarî yê qezaya Kerboranî yê Mêrdînî de şewat vejîya. Semedê hewnakerdişê şewatî çîyêk nêame kerdene.

7ê Hezîrane: Koyê Cûdîyî de dewa Şaxî de şewat vejîya û 5 rojan ra dima xo bi xo hewna şi.

5ê Hezîrane: Warê Mila Tikera yê Koyê Cûdîyî de şewat vejîya. Semedê hewnakerdişê şewatî çîyêk nêame kerdene.

2ê Hezîrane: Qezaya Cizîrî ya Şirnexî de qeraxê Çemê Dîcle de şewat vejîya.

29ê Gulane: Dewa Ogulî ya Colemêrgî de netîceyê guleyanê leşkeran de şewat vejîya û vila bi.

28ê Gulane: Bajarekê Kumçati yê Şirnexî de warê Deştadêmî de şewat vejîya û warê bi 300 doniman wele bi.