Serranê peyênan de tenûrî cayanê karî de xeylêk bale ancenê xo ser. Cayê winasênî semedê xeylêk cinîyan îmkanê gureyî afernenê.

Nanê tenûre serê sifreyanê kurdan de nêbo nêbeno. No nan kulturê kurdan o. Se ra 90 dewê Kurdîstanî nê tradîsyonî rê dewam kenê.

Averşîyayîşê teknolojî ra dima şaristanan de firinî zêdîyayî la nê serran de şaristanan de tenûrî virazîyenê.

Herêma Serhedî de tenûrî bi giranî binê herre de yenê cakerdene, herêma Botanî de serê herre de virazîyenê. Tamê nê nanan zî ê nanê firinî ra zaf cîya yo.

Cinîyî dima ke nanê tenûre pewjenê kenê wişkî, çend hewteyan ra dima ancî nerm kenê û sey nanê tezeyî wenê.

Qezaya Rêya Armûşî ya Wanî de Nurtene Orhana ke dadîya 5 domanan a û 46 serre ya cayê karî de nanê tenûre pewjena û vana ke no nan bala roniştoxanê Wanî xeylêk anceno. Nurtene di serrî yo kargehan rê  nan pewjena û roşena.

Nurtene vana ê cayê xo de pa 3 cinîyan 5 kesî xebitîyenê û vat: ''Şaristanijî hesretê nê nanî yê. 2 serrî verî mi cayêko winasên akerd, nika ma 5 kesî xebitîyenê. Her roje tewr tay hezar nanan roşenê. Ez pê nanê tenûre debara xo kena.''

Nurtane îfade kena ke ganî cinîyan payan ser o vinderê û wina dewam kena: ''Verî mi rê xebitîyayîş zehmet bi la mi waştişê xo ard ca. Ez bi hêvî ewnîyena ameyoxî ra. Wa cinîyî pê xo bawer bibê û pê hunerê xo tewrê berardişî bibê.''