Dêrsim de hingdarîye çimeyanê debare yê girîngan ra yew a. Emser varayîşê zêdeyî ra rekolteya hingimênî kêmîyaye coka hingdarî mîyanê tengîye de yê.

Dewa Çambulakî ya qezaya Pulirî ya Dêrsimî de hindaran Erdal Ekîcîyî û Abbas Gedîkî derheqê babete de PÎRHA rê qisey kerd.

Erdal Ekîcîyî da zanayene ke 13 serrî yo o hingdarîye keno la sey emserî berardişêko xirab nêdîyo. Ekîcîyî vat: ''Hetê bereketî ra emser zaf xirab vîyart. Ma emser do nêeşkê heqê keda xo bigêrê. Ma hetê ekonomîkî ra zî mîyanê tengîye de yê. Hukmat paştî nêdano hingdaran. 3-4 rojî yo ceyran birîyaye yo coka erzaqê ma zî bîyê xirab.''

Abbas Gedîkî pare kerd ke emser varayîşî zaf est bîyê û dima zî nişka ra germîye zaf zêdîyaya coka hingî nêeşkayê hingimênî virazê. Gedîkî vat: ''Rekolteya hingimênî goreyê parî se ra 25î ya. Hetê bînî ra seba ke heywanî zaf şinê vaşan ser vilikî kêmîyenê. Derheqê na mesele de qet yew selahîyetdar tênêgêreno. Meseleya ma ya ceyranî zî bi serran o nêameya çareserkerdene. Emser seba ma zaf zehmet bi. Ma do nêeşkê mesrafê xo zî vejê.''