Her serre pezkovîyî seba ke hewcedarîya xo ya seba solî peyda bikerê yenê rayîran ver. Pezkovîyê ke Dêrsim de sey heywanê fîrazî yenê dîyene koyanê berzan ra ameyî war û kişta rayîran de gêrenê sol. Pezkovîyî ameyî heta rayîrê Dêrsim-Xozatî ver. Tay hemwelatîyan zî werd da pezkovîyan û fotografê înan girewtî.

Hemwelatîyê bi nameyê Ozgur Dîkmeyî îfade kerd ke o reya verêne pê destanê xo werd da pezkovîyan û vat: ''Ez reya verêne nê heywanan hende nêzdî ra vînena. Hîsêko weş o. Kam senî qemîşê nê heywanan beno? Nê heywanî fîraz ê. Gamî merdîmî vera seydwanîye tewirê xo bimojnê.''

Ozleme Kandemîr zî vat: ''Ma ewro ameyî ke nê cayan zîyaret bikerê û ma nê pezkovîyî dîyî. Dîyayîşê înan zaf weş o. ''

Caner Karatayî zî wer da pezkovîyan û vat: ''Nê heywanî fîrazîyê ma yê, heywanê Xizirî yê. Bawerîya ma de kiştişê nê heywanan guna yo, ganî ma wayîrê înan bivejîyê.''

Murat Kandemîrî zî vat: ''Zaf rind o ke nê heywanî wina tîya de ciwîyenê û merdimî zî qerişê ci nêbenê. Welatê mi de çîyo winasên çin o.''