17ê tebaxe ra nata Dêrsim de şewato ke leşkeran vet dewam keno. 13 rojan ra dima şewatî rê mudaxele ame kerdene la 28ê tebaxe de narey netîceya operasyonê leşkerî de Gelîya Pilemurîye de Çemê Roje de şewat vejîya ke ci rê mudaxele nêno kerdene. 29ê tebaxe de zî Çirrê Firtina Velîyî yê Gelîya Munzurî de şewat vejîya. 4 rojan ra dima hewayî ra mudaxeleyê şewatî  ame kerdene. La şewat vilayê wareyê Gule bi.

Dêrsimijan derheqê şewatan de Ajansê Mezopotamya rê qisey kerd.

Abdullah Çiglikî da zanayene ke leşkerî her serre şaristan de şewatî vejenê û vat: ''Semedo ke ê bi xo şewat vejenê ci rê mudaxele nêkenê. Ege û herêmanê Dengizê Sipîyî de cade şewatan rê mudaxele yeno kerdene. Ma pêro tarîxî de ame wetêrkerdene. Mabênê şewatê Dêrsimî û şewatê Mugla de cîyatîya pîle esta. Ma zî selahîyetdarî zî sebebê na cîyatîye zanenê.''

Îmam Morogluyî vat: ''Dewlete nê şewatan vejena. Ê wazenê wa Dêrsim çin bo, xozaya ci çin ba, merdimî vêşan bimanê.'' 

Esnaf Şukrane Yilmaz (50)  vat: ''Dêrsim qestî ra yeno vêşnayene. Pêro koyê Dêrsimî ameyî vêşnayene. Hetê bînî ra yew reşwa rantî zî esta. 109 şîrketan rê destûrê cigêrayîşê madenî dîya. Gandarî hê vêşenê. Ma wehşetêko winasên nêdî.''

Nazane Yikilmaz vat: ''Ganî ma gandaranê xo û waranê xo bipawê. Ganî dewlete naye bikerê.'' Aytene Arslan zî pare kerd ke ganî pê helîkopteran şewatî rê mudaxele bêro kerdene. 

Sonaye Çelîk Bozkurt vat: ''Her roje daristanê ma dîyenê bombayan ver. Qestî ra daristanê ma yenê vêşnayene. Dewlete dişmenîya xoza kena û bi serran o armanc kena ke Dêrsim çin bikera.''