Vervatoxê Platformê Pawitişê Hewselî Vahap Işikliyî ke derheqê şewatê Koyê Cûdîyî de qisey kerd ard ziwan ke şewatî bi destê dewlete yenê vetene.

Çarçewa şerê çinkerdişî yê vera kurdan de Kurdîstan de merdiman ra heta xoza her çi hedefê dewlete de yo. Şirnexî ra heta Amed, Çewlîg, Dêrsim û Colemêrgî her cayê Vakurê Kurdîstanî vêşeno. Koyê Cûdîyî yê Şirnexî de şewat pede-pede vila beno. Hema ke şewatêk hewna nêşîyo şewato bîn vejîyeno. Seba ke selahîyetdarî şewatî hewna nêkenê vengê nêrazîbîyayîşan berz beno. Rîyê şewatî ra heta ewro  biseyan darî û bax û bexçeyî vêşayî.  Şewat keyeyanê şarî ra nizdî bîyo.

Vervatoxê Platformê Pawitişê Hewselî Vahap Işikliyî ke herême zîyaret kerd derheqê şewatî de nê vatî:  ''Şewatê daristananê Kurdîstanî polîtîkayanê şerê taybetî ra qewimîyenê. Şirnex de qirkerdişo ekolojîk ciwîyeno. Cûdî, Gabar, Besta, Licê û Dih de şewatî bi destê dewlete vejîyenê.  Herême de leşkerî şewat vejenê. Dewlete wazena ke herême bikero warê leşkerî. Cayo ke şewat vejîyeno cade qereqol virazenê.

Nika şewat 2 waran rê vila bîyo.  Xora verê şewatî ra serrêk a qorîcîyî daran birnenê. Tewr zaf zî daranê melengiçî ke çimeyê debarê şarê herême yê înan birnenê. Wazenê ke şarî bi vêşanîye terbîye bikerê û herême ra vejê. Hem qirkerdişê ekolojî kenê hem zî nêverdenê ke şar şewatî hewna bikero. Nê şewatî derba gonîna ke bi serran o herême de dewam kena. Sebebê ci zî meseleya kurdî ya.  Bi serran o ke herême şer û pêkewtişî dewam kenê. Daristanî bi destê dewlete yenê vêşnayene.''