Gozêranê dewanê Hewramanî de nêweşîya qirkere ya ke sey lareş yena zanayene bena vila. Nêweşîye bi hawayêkê giranî tesîrê gozêran kena. Di serran ra nata herême de nêweşîye ra se ra 20 gozêrî wişk bîyî. Na nêweşîya lareşî ya ke kokê dare ra dest pêkena nêverdane ke dare gozan bida û dima zî bi temamî dare kena wişk.

Sebebê nêweşîye hema nêna zanayene la îdareyê ramitişî bi dermanan xîret keno ke verê nêweşîye bigêro.

Hemwelatîyê bi nameyê Mihemed Hacî Reşîdî yo ke herêma Sosekanî ya Hewramanî de baxê xi esto vat: ''Na nêweşîye vera vila bena û heta nika çareserîya ci nêameya dîyene. Ma Wezaretê Zîretî ra wazenê ke cade têbigêro û çareserîyêke bivîno.''

Muhendîsê Beşê Pawitişê Nebatan Şerîf Mahmud zî derheqê babete de vat: ''Serra 2018î ra nata ma bilîyê na nêweşîye yê. Ma numûneyêkê dare şawit laboratuwarê Helebçe. Eşkera bi ke na tewirêkê nêweşîya bakterîyan a. Ci rê vanê lareş.''

Goreyê doneyanê Îdareyê Zîretî yê Helebçe Hewraman û Helebçe de nêzdîyê 100 hezar gozêrî estê. Hewraman de citkarê ke gozêrî seba înan çimeyêkê debarî yê rewşe ra qerqilîyenê.