Cografyaya Kurdîstanî hetê dewleta tirke ya îşxalkere ra binê nameyê şerî de yena talankerdene. Operasyonê leşkerî yê Şirnexî de darî yenê birnayene. Koyê Cûdîyî de heta nika bi desan darî birîyayî û bi xeylêk qereqolî ameyî înşakerdene. Cayanê ke darî nênê birnayene de zî şewat vejîyeno û bi bahaneye 'asayîş'î destûr nêdîyeno ke şewat bêro hewnakerdene.

Hemvervatoxê Paltformê Pawitişê Hewsêlî Vahap Işikliyî ANFyî rê derheqê mesele de qisey kerd. Işikliyî vist vîrî ke herêma Besta ya Şirnexî de şewato ke vejîya bi rojan dewam kerd û dima ra zî gorîcîyan darî birnayî û vat: ''Hewteyêk verî zî eynî rewşe Licê de qewimîyaye. Di rojî verê cu Cûdî de reyna şewat vejîya û hema dewam keno. Vera xozaya Kurdîstanî polîtîkaya taybete yena rayraberdene. Her serre rîyê polîtîkayanê şerî ra serrewextê hamnananî de darî yenê birnayene û vêşnayene.''

Işikliyî bale ante ser ke şewatê ke Kurdîstan û Tirkîya de vejîyenê ci rê mudaxaleyo cîya yeno kerdene û vat: ''Marmarisê Tirkîya de şewat vejîya pê helîkopteran ci rê mudaxale ame kerdene. Eynî roje Çewlîg de şewat vejîya yew hewte nêame hewnakerdene. Bi hezaran hektar daristan vêşa bi wel. Netîceya operasyonan de Kurdîstan de şewatî vejîyenê. Xozatê Dêrisîmî de badê operasyonê leşkerî şewat vejîya bi rojan nêame hewnakerdene. Reyna Çewlîg û Cûdî de zî eynî çî bi.  Bado ke îxaleyê birnayîşê daran dîya qorîcîyan Cûdî de yew serre de 450 ton darî birîyayî. Nika eynî çî Licê de kenê. Dewa Derxunî û cayanê bînan de warê hîra de kenê. Tirkîya de rîyê rantî ra Kurdîstan de binê nameyê 'asayîş'î de şewat vejîyenê Tirkîya de herinda şewatî de otêlî yenê viraştene Kurdîstan de qereqolî.''

Işikliyî vîst vîrî ke Başûrê Kurdîstan de zî polîtîkaya vêşnayîş û rijnayîşê daristanî dest pêkerda û vat: ''Çi heyf ke Metîna û herêmanê bînan ê Başûr de zî pîya bi şerî birnayîşê daran dest pêkerd. Kêm bo zî hukmatê Iraqî vera nayî vejîya la hukmatê herême vera nayî qet reye nê şuxulnaye û berpirsîyarîye nêgirewt. Senî wina darê herême yenê birnayene û daristan yeno talankerdene û hukmat vera ci bêveng o, eceb o.''

Işikliyî vat: ''Vakur de polîtîkayê vengkerdişê dewan ke bitaybetî 1990î de destpêkerd dewam kenê. Polîtîkayê asîmîlasyon û talankerdişê xozaya Kurdîstanî yenê domnayene. Şer têna vera şarî nê vera xoza zî yeno kerdene. Têna Kurdîstan de nê Tirkîya de zî rîyê rantî ra şewat yeno vetene. Amazonî ra heta Hewselî, Cûdîyî ra heta Metîna xoza ya ma pêrun a. Coka ganî ma pêro pîya wayîrê xoza vejîyê.''