Cinîyê ke dewa Rîzî ya Dara Hênî ya Çewlîgî de ciwîyenê, her mewsîmî zehmetîya cîya dir têrî manenê. Cinîyê dewe destpêkerdişê wisarî ra heta peynîya hamnanî bax û baxçeyan reyde eleqedar benê. Sewbîna cinîyê ke debara xo bi pesdewarî kenê zî seba weyekerdişê pesî verê xo danê zozanan. Nê cinîyî wesar ra heta payîzî zozanan de pes weye kenê.

Nê cinîyan ra yew zî Zozane Uvat a. Zozane ajansê Jİnnewsî rê qala kar û barê xo kerde.  

Zozane Uvata ke nêzdîyê 20 serrî yo bêrîvanîye kena, qala rojêka xo wina kerde: "Ez saete 5 de haya bena. Verî ez manganê xo ancena. Dima ra semedê nanî arayî amade kena û karê keyeyî kena. Wexto saete bena 9 ma şinê pes ancenê. Ver bi şanî ma reya bîne pesê xo ancenê.  Cuya ma ya rojane wina ya. Cuya xoza rixmê zehmetîyan zî weş a.

Zehmetîya karê ma xora her hetî ra yeno vînayene û yeno zanayene.  Ma pes weye kenê û no kar zî zehmet o. Ma înan benê cayê koyî û zozanan. Sewbîna mewsîmê zimistanî de zî karê ma tewr zaf zehmet beno.  Cuya koçeran de tewr zêde cinîyî kede danê û yê ke tewr zêde zehmetî ancenê reyna cinî yê. Ma hamnanî şinê cayêkê bînî û zimistanî şinê cayêkê bînî. Rixmê her zor û zehmetîye ma cuya xo ra hes kenê."