Taxanê Entax, Gom û Bamitnî yê qezaya Licê yê Amedî de çend rojî verî şewat vejîyabi û şarî pê îmkananê xo şewat hewna kerdbi. Menga peyêne de heman warî de hîrê reyî şewat vejîya. Vizêr Têgêrayîşê Ekolojî yê Mezopotamya herême de cigêrayîşî kerdî û dewijan de qisey kerd. 

Şaro ke pê îmkanê xo şewat hewna kerdo, Ajansê Mezopotamya rê qisey kerd û pare kerd ke şewatî rê mudaxele erey yeno kerdene. Netîceya şewatî de goristanê Gomî û di keyeyê Entaxî texrîb bîyî.

Roniştoxê taxa Entaxî Emîn Yayliko ke cade pê şewatî hesîyayo û wextê mudaxeleyî de destê ci birîndar bîyê vat: ''Ez saete 10.00 de pê şewatî hesîyaya. Awe çin bîye, ma zî pê gilanê daran kerd ke şewat hewna bikerê. Seba ke va berz bîyêne şewat zî xurt bîyêne. Eke ekîpa îtfaîya lez biameyêne cade şewat hewna şîyayêne. Dima îtfaîya ameye la nêeşkaye debikewa warî. Heta ke ê ameyî şewat vila bibi. Ma ganê xo bi zorî xelisnayê. Hema zî serê koyî ra dû berz beno. ''

Yaylikî da zanayene ke heman warî de hîrê reyî şewat vejîyayo û vat: ''Di keyeyê merdimanê ma vêşayî. Merayê heywanî zî vêşayî. Her serre wina beno. Emser no şewato hîrêyîn bi. Ma nêzanenê ke şewat senî vejîyayo la nêzdîyê rayîrî de dest pêkerdo.''

Hemwelatîyê bi nameyê Nîyazî Hantaşî zî pare kerd ke şewatî rê rew mudaxele nêameyo kerdene û vat: ''Îtfaîya ameye la erey ameye. Ma pê ardimê dewijan û şarê dewanê bînan mudaxele kerd. Ma şan 20.30 de şewat girewt binê kontrolî la serê sibayî reyna dest pêkerd. Hema zî dewam keno.''

Dewijan venga selahîyetdaran da ke hîna bi hawayêkê lezî û bitesîrî mudaxeleyê şewatî bikerê. 

Licê de şewat dewam keno.