HDKyî bi wesîleya Roja Ziwanê Dayîke ya Mîyanneteweyîye Merkezê Tumbel-Senî de panelêk kerd. Rêxistinê komelkî yê sivîlî, îdareyê HDPyî yê Îstanbulî û endamê HDKyî tewrê panelî bîyî. Prof. Dr. Fatma Gok û wekîlê HDPyî yê Wanî Tayîp Temelî sey panelîst tewrê panelî bîyî.

Prof. Dr. Fatma Gok vat: ''Heqê her domanî esto ke bi ziwanê xo perwerde bivîno. Astengê verê kurdkî polîtîkayê yewpareyî yê. Ganî ma nînan bivurnê. Ziwanê dayîke beşo tewr girîng ê meseleya kurdkî yo. Ganî keyeyî xîret bikerê ke domanê ci kurdkî bimusê û bi hawayêkê cidîyî biewnê mesele. Ganî seba averşîyayîşê kurdkî xebatî bêrê kerdene.''

Wekîlê HDPyî yê Wanî Tayîp Temelî zî bale ante rewşa kurdkî ser û vat: ''Meseleya kurdkî û meseleya ziwanê dayîke îdeolojîk a. Eke cayêk de meseleya nasnameyî, meseleya statutî, meseleya estbîyayîşî estba uca de meseleya ziwanê dayîke û kulturî zî bena. Wayîrvejîyayîşê kurdkî bi xo çalakîyêka polîtîk a. Rayîrê têkoşînî yê vera na mesele tewirêko polîtîk û îdeolojîk o. Ganî seba ke kurdkî vîn nêba hem hetê polîtîkî ra hem zî hetê îdeolojîkî ra têkoşîn bêro kerdene. Ganî warê neweyî yê têkoşînî bêrê awankerdene. Kurdan seba ke ziwanê xo bipawê şer kerd û na aste ra dima ganî prosesê awankerdişî dest pêbikero.''