Çimeyê Munzurî yê ke bawerîya Dêrsimî de cayê taybetî gênê, yeno waştene ke tede awanîyê turîstîkî bêrê viraştene. Vera babete nêrazîbîyayîşî dewam kenê. 

Alî Baba Akdogan dewa Zîyaretî de ciwîyeno û 17 serran ra nata Çimeyanê Munzurî de  çira roşeno û bi hawayêkê zerrîwazî miqatê çimeyan beno. Akdogan zî seba rewşa Çimeyan zaf qerqilîyeno. Akdoganî da zanayene ke kokê ey zî kokê Munzur Babayî ra yeno.

Akdoganî ard ziwan ke seba ke dormeyê çimeyan lêşin nêbo destê ci ra çita yeno keno û vat: ''Ez 17 serran ra nata xizmetê Muznur Babayî kena. Mi rayêk selahîyetdaran ra waşt ke serê pirdî bivirazê yan zî ez do biviraza. O çax mi serê pirdî û lawaboyî viraştî. Xizmet seba Heq û Munzur Babayî yo. Ez miqatê nê daran bena. Nika vanê ke ê do tîya de tay awanîyî bikerê. Wa destê xo nêdê çilkêka awa Munzur Babayî. Eke pê dozeran, wesayîtê karan bêrê Munzur no do weş nêbo. Destpadayîşê kerraya Munzurî zî qedexe yo. Çunke Munzur tim wina hêrikîyayo.

Nimajê ma semah o, îbadetxaneyê ma cemxane yo. Ma vera bawerîya çewî nîyî.Senî ke ma destê xo nêdanê fîrazîyanê çewî, wa çew zî destê xo nêdê ê ma.''