Wendekarê beşê Edebîyat û Ziwanê kurdkî pê bawer nîyê ke mezûnîyetî ra dima do bêrê wezîfedarkerdene yan ney. Edebîyat û Ziwanê Kurdkî yê Zanîngehê Çewlîgî de bi temamî 100 wendekarî estê û ê zî heman semedî ra biqesawet ê. Wendekaran waşt ke bi taybetî tedaya vera kurdkî ya dezgehanê umûmîye de biqeda û ê bêrê wezîfedar kerdene.

Wendekarê Edebîyat û Ziwanê Kurdkî Halîk Akgulî sinifa yewîne de waneno. Akgulî vat: ''Eke ez ziwan û edebîyatê xo mîyan de nêciwîya ez zanena ke ez do sey kêm bimana. No beş hetkarîya mi bikero ke ez do tam biba. Warê kurdkî de çimeyî zaf tay ê. Ganî kurdkî hema dibistane de zî sey fermî bêra mojnayene. Wexto ke babete kurdan û kurdkî biba qanûnî goreyê keyfê serdestan yenê caardene. Têkoşînê kurdan ê seba kurdkî beşê Edebîyat û Ziwnaê Kurdkî bêro girewtene zî do dewam bikero. Kurdkî rastê astengîyanê fermî û nêfermîyan yena.

Sinifa yewîne raÎlyas Batuyî zî îfade kerd ke hema zî yew statuyê kurdkî çin o û vat: ''Îmkanê karî bêstatutîya kurdkî û meseleyanê kurdkî reyde eleqedar o. Astengo tewr pîl ê vera averşîyayîşê kurdkî polîtîkaya teda û sîstemê înkarî yo. Heta ke sîstem wina dewam bikero kurdkî zî bi hawayêkê giranî estbîyayîşê xo dewam bikera. Seba ke qîmet û erjê kurdkî hîna zêdêr bêrê famkerdene ganî reya verêne waştişê qiseykerdoxê nê ziwanî bêrê qebulkerdene.''

Wendekarê sinifa diyîne Îhsan Arslanî zî da zanayene ke seba ke kurdkî ha çin bena, hîna tay yena qiseykerdene û dibistanan de perwerdeyê kurdkî nêno dayene ey no beş weçîna. Arslanî waşt ke astengê vera mezunanê beşê kurdkî bêrê wedaritene û ê bêrê wezîfedarkerdene. Arslanî vat: ''Beşê kurdkî têna 3 zanîngehan de esto û hema zî verê ci de astengî estê. Na rewşêka xirab a. Ez hêvî kena ke tedaya vera kurdkî qedîyena.''