Dêrsim de menga Xizirî bi rojeyan û rîtuelanê bawerîye dewam kena. Mega Xizirî de loqmeyî yenê vilakerdene, şar şinê jîyargeyan û turbeyan û waştişê holî yenê kerdene. Reyna na menge de cemî yenê girêdayene, qurbanî yenê serebirnayene û rojeyî yenê girewtene. Rojeyê Xizîrî roja sêşeme, çarşeme û pancşemeyê sibate de yenê girewtene û peynîya sibate de qedîyenê. Ocaxê Pîrî Sevdînî ra Alî Doganî û Ocaxê Dervîş Cemalî ra Menşure Dogan qala girîngîya Xizirî û rîtuelanê bawerîyan kerde.

 Pîr Alî Doganî ard ziwan ke Xizir hetê bawerî, kultur û komelkî ra her warê cuye de cagêno. Doganî da zanayene ke Xizir seba elewîyan erjêko pîl o û vat: ''Ma seserran o ke rojeyê Xizirî gênê. Bi taybetî cografyaya 'Rêya Heqî' û ewladê ci nê kulturî danê dewamkerdene. Pîlanê ma seba çemê tewrî pîlî vat Munzurê Çemê Xizirî û seba koyê tewr berzî yê Munzurî zî vat 'koyê Xizirî.' Ewro şima şorê ça nîşangehêkê Xizirî esto. Ma de seydwanîye qedexe ya. Pevkovîyî ma de sey heywanê Xizirî yenê şinasnayene. Xizir ma de o kes o ke tengasîye de yeno, her ca de yo û her wext vejîyeno verê merdimî.''

Menşure Dogan vat: ''Her kes venga Xizirî dano û pêro kulturan de Xizir esto. Menga Xizirî de pêro cîranî loqmeyê xo gênê yenê dewa pîrika mi.  Pîrika mi zî wina loqmeyan dana înan. Yanî loqmeyî vila benê. Ma hermenga Xizirî de wina kenê. Kamê ke bêrê keyeyê ma, ma çîyêk danê ci. Çunke beno ke oyo ke ame Xizir bi. Xizir Homa û pêxemberan ra berzêr o. Çunke Xizir bi herkerdişê merdiman, îmanî û Homayî zerrîya merdiman de yo. Menga Xizirî roja sêşemeyî dest pêkena. Goreyê şertê îklîmî ca bi ca wextê ci bedelîyeno. Roja pancşemeyî cem yeno girêdayene. Dêrsim de qasê 3 rojan rojeyê Xizirî yeno girewtene. Tay cayan de zî qasê 5 rojan yeno girewtene. ''

Dogane eşkera kerd ke kesêk zî bi teda roje nêgêno û vat ke bawerîya elewîtîye de rizaya Heqî zaf girîng a.