Qezaya  Xozatî ya Dêrsimî de mabênê dewamê Zogar û Şamoşî de par darî bi bahaneya 'operasyonê leşkerî' ameybî birnayene û 5 mengî yo zî bi bahaneya 'newe ra zîldayîşî' yenê birnayene.

Îhaleya birnayîşê daran de yeno vatene ke qasê 400 hektar de darî do bêrê birnayene. 

Hemserekê HDPyî yê Dêrsimî Ferhat Yildizî da zanayene ke darê ke parî ra weş mendê zî binê nameyê rehabîlîtasyonî de emser birîyenê û vat: ''Darê ke birîyenê yenê vêşnayene û tira komir virazîyeno. Dima zî no komir roşîyeno. Selahîyetdarî vanê ke 'ma daranê vêşayeyan birnenê' la nê darî payan ser de yê, heta zîl danê.  8ê teşrîna verêne de Mîtîngê Xoza de şarê ma vera qirkerdişê daran û ocaxanê madenan nêrazîbîyayîşêko pîl mojna ka dewlete goş nêda şarî.'' 

Yildizî pare kerd ke pê qirkerdişê daran Dêrsim de polîtîkaya 'bêmerdimverdayîşî' yena caardene û vat: ''Wexto ke daristanî çin benê warê cuye zî çin benê. Dewlete wazena ke bi nê hawayî merdimî herême ra koç bikerê. Dewlete wazena polîtîkaya asîmîlasyonî rê dewam bikera, xoza texrîb bikera û pê qirkerdişê daran Dêrsim û Şirnex merdiman ra veng bikera.''