Mamostayî: Ganî her keye bibo dibistanêke

Mamostayanê Enstîtuya Kurdî ya Îstanbulî bale ante ser ke ziwan seba dewamê estbîyayîşî hacet o û vera politîkaya asîmîlasyonî vat: "Ganî her keye seba kurdkî bibo dibistanêke.''

Ziwanê kurdkî vera polîtîkaya asîmîlasyonî ya sîstematîke têkoşîn keno. Enstîtuya Kurdî ya Îstanbulî zî bingeyêkê nê têkoşînî ya. Enstîtu serra 1992î de bi armancê averberdişê ziwanê kurdkî ame awankerdene. Mamostayanê Enstîtuya Kurdî ard ziwan ke seba ke ziwanê kurdkî aver şêro û biciwîyo ganî hîna zêde têkoşîn bêro kerdene. 

Mamostayan ra Ozleme Kurt îfade kerd ke ziwanê kurdkî ho çin beno û ganî kurdî pê naye bihesîyê û wayîrê ziwanê xo bivejîyê. Ozleme Kurt vat: " 20 serran ra dima têna beşêkê komelê ma do kurdkî qisey bikero. Jenerasyono newe kurdkî ra beno dûrî. Heyfo ke wina yew rastîye esta. 

Pêro îqtîdaranê Tirkîya polîtîkaya asîmîlasyonî ya vera kurdkî xebitnaye hema zî xebitnenê. Ganî ma domananê xo reyde kurdkî qisey bikê. Çar parçeyanê Kurdîstanî de polîtîkayê asîmîlasyonî bi cayanê karan, bi televîzyonan yenê caardene. Eke vera naye tedbîranê xo nêgêrê polîtîkaya asîmîlasyonî do ser bikewa. Aslê xo de tedbîrgirewtiş zaf asan o. Ma dadîyanê xo ra kurdkî musenê. Eke dadîyî keyeyanê xo de kurdkî qisey bikê polîtîkaya asîmîlasyonî do bin bikewa. Ganî ma keyeyanê xo de kurdkî qisey bikerê."

Mamostayanê Enstîtuya Kurdî ya Îstanbulî ra Fevzîye Uçar vat: "Na dewlete tewr zaf hêrişê ziwanê ma kerd. Çira? Çunke ziwan nasnameyê ma yo. Ziwanêk bingeyê estbîyayîşê neteweyêkî yo.  Ganî her keye seba kurdkî bibo dibistanêke. Ganî ziwanê sîyasetê kurdan zî kurdkî bibo. No zaf girîng o. Çunke têna bi nê hawayî ziwan mîyanê komelî de vila beno û şar wayîrê ziwanê xo vejîyeno, ziwanê xo aver beno. Reyna kurdkî bi nê hawayî keyeyan de beno vila."