Kuçeyê Îstîklalî yê Taksîmî yê Îstanbulî de her netewe ra deyîrbaz û muzîsyenî eşkenê hunerê xo îcra bikerê la deyîrbaz û muzîsyenê kurdî tim raştê tedaya polîsan ê tirkan yenê.

Polîsê tirkî nêverdenê deyîrbazê kurdî bi kurdkî vajê, dest nanê hacetanê înan ser, cezaya pereyî danê înan. Tay deyîrbazanê kurdan ê Îstîklalî derheqê babete de Ajansê Mezopotamya rê qisey kerd. 

Mehmet Yukselî îfade kerd ke o wextê dergî ra nata kuçeyan de deyîran vano û da zanayene ek şar eleqeyêkê pîlî mojneno deyîrbazanê kurdan. Yukselî vat: ''Polîsî Îstîklal de tim tedaya ma kenê. Polîsî ma rê vanê 'No ca cayê kurdan o, şima nêeşkenê  tîya de deyîranê kurdkî vajê.' Polîsî cezaya 200 lîra danê ma. Tedaya polîsan ra ma nêeşkenê debara xo bikerê.''

Deyîrbaz Devran Ronîyî ard ziwan ke o 6 serrî yo kuçeyan de deyîran vano û vat: ''Ge ge têna polîsî nê kesê nîjadperestî zî fek erzenê ma, vanê 'Tîya de bi kurdkî mevajê, tîya Tirkîya ya.' Ez heta ke weş biba tim bi kurdkî deyîranê xo vaja.''

Ferhat Demîrî da zanayene ke 10 serrî yo o bilîyê muzîkî û 4 serrî yo zî kuçeyan de deyîran vano. Demîrî vat: ''Zabita û polîsî tim tedaya ma kenê. Nêverdenê ma deyîranê kurdkî vajê. Ge ge polîs û zabitayî danê embazanê ma ro.'' 

Faruk Urunî pare kerd ke o Îstîklal de hunermendîya kuçeyî keno û vat: ''Xeylêk neteweyê cîyayî tîya de muzîk kenê. La têna ma maruzê teda manenê. Zaf reyî polîsan seba ke ma kurdkî deyîrî vatî destbend kerdî û qereqol de îfadeyê ma girewt. Ma ney ra yew çareserîye wazenê.'' 

Deyîrbaz Ahmet Naîfogluyî vat: ''Ma polîs û zabitayan ra remenê û seba ke ma bi kurdkî deyîran vanê tim maruzê cezaya pereyî manenê.''