Nika ra 31 serrî verê cû 'Bilbilê azadîye yê baxçeyê kurdan' dinyaya xo bedilnaye labelê berhemê ey hema zî ziwanan de yê. Ma qala nê vengê Rojawanê Kurdîstanîi qala Mihemed Şêxoyî kenê.

Mihemed Şêxo emrê xo yê bi 41 serran de bi berhemanê xo yê cîyayan zerrîya kurdan de cayêko taybet girewt. Mihemed Şêxo bi nameyê xo yê rastikênî ''Mihemed Salîh Şêxmûsî'' serra 1948î de dewa Girbawî yê Qamişloyî de ame dinya. Şêxo serra xo ya qije de musa ke tembûr bicêno. Şêxoyî Qamişlo de zaf hunermendî nas kerdî la tewr zaf tesîrê Aram Tîgranî de mend. Mihemed Şêxo serra 1969î de seba ke hunerê xo xurt bikero şi Lubnan û 2 serran perwerdeyê muzîkî girewt dima zî koma muzîkî ''Serkeftin'' awan kerd. Kome de hunermendanê ciwanan sey Ramazan Omerî, Mehmud Ezîz, Peruîn ca girewtêne. Mihemed Şêxo dima zî derbazê Bexdadî bi û beşê kurdkî yê radyoyê Bexdadî de deyîra ''Bisk'' pêşkêş kerde.

Şêxo wexto ke agêra Rojawan, albumê xo yo verên ''Ay Gewrê'' viraşt. O çax teda û zordarîya dewleta Sûrîye giran bîyî. Rejîmê Sûrîye Şêxo rê gef wend ke ê do ziwanê ci cêra bikerê. Şêxoyî zî vat ke eke ê ziwanê ci cêra bikerê o zî do pê çimanê xo şarê xo rê deyîran vajo. Şêxoyî bi nê hewayî tewirê xo rê tawîz nêda. Teda, destbendkerdiş û tepiştişî ra Şêxo neare mend ke derbazê Başûrê Kurdîstanî bikero. Tîya de tewrê pêşmergeyan bi û hunerê xo dewam kerd. Wexto ke pêşmergeyan xo ant Rojhelatê Kurdîstanî Şêxo zî şi Rojhelat û uca de hem mamostatîye kerde hem zî hunerê xo ard ca. Rejîmê Îranî zî pê naye hesîya.Semedo ke Şêxoyî deyîra xo de vatêne ''"Ey felek/ ji bo çi bextê me hoye/ Em bê dost û bê kesin" (Ey felek, çira bextê ma wina yo, ma bêdost û bêkes ê.) derheqê ci de tehqîqatêk dayîya destpêkerdene.

Radyoyê Tehranî Şêxoyî rê vat ke eke deyîranê ci de herinda Kurdîstan de Gulîstan binuso ê do deyîranê ci pare bikerê. Şêxoyî no qebul nêkerd û derheqê ci de dewa ameye akerdene.Mihemed Şêxo 11 serran ra dima agêra Qamişlo. Ne komêke estbî ne zî hunermendêk. Şêxoyo ke deyîranê xo de rastîya kurdan û dejê parçebîyayîşê Kurdîstanî ra behs kerdêne û able antene neteweyê kurdan ser deyîranê xo yê eşqî de zî îfade kerdêne ke bêwelat eşq nêbeno eşqêko rastikên. Şêxoyî deyîranê xo de bi vatişê ''gulî'' nîşanê kurdan Kurdîstanî kerd.  Şêxo bi rengê azadîye hunerê xo viraşt, bi xîretêkê bêhempayî zî kultur û muzîkê kurdan pawitî.Şêxoyo ke wayîrê deyîranê "Ay lê Gulê, Heps û Zindan, Ey Felek, Nesrîn, Gulîzar ve Dêrsim û Agirî" yo emrê xo yê bi 41 serran de 14 albumî amade kerdî û 4 reyan surgun bi. Mihemed Şêxoyî 9ê adara 1989î de Qamişlo de dinyaya xo bedilnaye.